काठमाडौंसहित देशभर चिसो बढ्याे

१ पुस, काठमाडौं । जल तथा मौसम पूर्वानुमान महाशाखाले देशभर चिसो बढेको जनाएको छ ।  चिसो अझै बढ्न सक्ने महाशाखाका बुधबार मौसमी बुलेटिन मर्फत जानकारी दिएको छ ।

गएको वर्षभन्दा यो वर्ष अझै चिसो हुन सक्ने पूर्वानुमान गरिएको छ ।  काठमडौंमा अघिल्लो वर्ष पुस १ गतेको तुलनामा आज १ दशमलव ५ डिग्री सेल्सियस कम तापक्रम मापन गरिएको छ । आज बिहानको न्यूनतम तापक्रम ३ दशमलव ५ डिग्री मापन गरिएको महाशाखाले जनाएको छ । गएको वर्ष आजको दिन काठमाडौंको न्यूनतम तापक्रम ५ डिग्री सेल्सियस थियो ।

महाशाखाका अनुसार आज दिउँसो तापक्रम अझै घट्न सक्छ । काठमाडौंसहित देशका अरु ठाउँमा पनि तापक्रम घट्दै गएर जाडो बढेको छ । हिजो जुम्लाको न्यूनतम तापक्रम माइनस ७ डिग्री सेल्सियससम्म झरेको थियो । यस्तै जिरीको माइनस २ दशमलव ५, जोमसोमको माइनस २, काठमाण्डौको ३, ओखढुङगा र ताप्लेजुङको ५ दशमलव ४, दिपायलको २ दशमलव ८, डडेल्धुराको ३ दशमलव ४, बीरेन्द्रनगरको ४ दशमलव ३ डिग्री सेल्सियस मापन गरिएको थियो ।

आजको तापक्रम पनि यस्तै हाराहारीमा रहने महाशाखाले जनाएको छ । यसैबीच अहिले पूर्वी र पश्चिमी तराईका केही ठाउँमा कुहिरो लागेको छ । दिउँसो कुहिरो हटेर घाम लाग्ने सम्भावना छ । पश्चिमी वायुको प्रभावका कारण आज प्रदेश १, २ र गण्डकी प्रदेशमा आँशिकदेखि सामान्य बदलीको सम्भावना र बाँकी ठाउँमा दिउँसो घाम लाग्ने महाशाखाले जनाएको छ । महाशाखाका अनुसार राति पहाडी भेगमा आशिक बदली रहने छ ।