नेपालगञ्जमा पक्राउ परेका चन्दलाई तत्काल छाड्न कांग्रेसको माग

१६ पुष, काठमाडौं । नेपाली कांग्रेसले पक्राउ परेका पार्टीका क्रियाशील सदस्य डिल्लीबहादुर चन्दलाई तत्काल रिहा गर्न माग गरेको छ । नेपालगञ्‍जमा गिरफ्तारमा परेका चन्दलाई काठमाडौं ल्याउने घटनाप्रति आपत्ति जनाउँदै कांग्रेसले तत्काल रिहाई गर्न माग गरेको हो ।

बाँकेको नेपालगञ्‍ज उपमहानगरपालिका १८ निवासी चन्दलाई पुस १४ गते राति गोर्खाज फाइनान्सको कार्यालयमा डिउटीमा रहेको बेला प्रहरीले पक्राउ गरेको थियो । चन्दलाई गत बैशाखमा पूर्वप्रहरी महानिरीक्षक सर्वेन्द्र खनाल, नेकपा ओली समूहका नेता महेश बस्नेतको सांसद अपहरणसम्बन्धी घटनासम्बन्धमा सामाजिक सञ्‍जल फेसबुकमा लेखेकै आधारमा पक्राउ गरेर काठमाडौं ल्याइएको हो । उक्‍त घटनाप्रति कांग्रेसले विरोध जनाएको हो ।

‘कोरोनाको महामारी चलिरहेका बेला दल विभाजनको अध्यादेश ल्याउनु, सांसद अपहरणको अभियोग लाग्‍नु, मुद्दा दर्ता नगर्न प्रहरीलाई दबाब दिनु जस्ता घटना भएका बेला एक होइन हजारौं डिल्ली चन्दहरूले घटनाको विरोध गरेर सामाजिक सञ्‍जालमा लेखेकै हुन्,’ कांग्रेस प्रवक्ता विश्वप्रकाश शर्माद्वारा जारी विज्ञप्तिमा भनिएको छ, ‘त्यस प्रकृतिको कुनै लेखाइले कुनै पनि ब्यक्तिलाई गाली बेइज्जती गरेको स्थिति हो भने त्यस्तो घटनामा कारवाहीका लागि ०७४ मा जारी गरिएको मुलुकी अपराध संहितामा अलग्गै व्यवस्था छ । तर त्यो कानूनी प्रक्रिया भन्दा विपरीत गएर प्रतिशोधपूर्ण ढंगले गिरफ्तार गर्नु भनेको सत्ताको आडमा विद्युतीय कारोबार ऐन र प्रहरी समेतको दुरुपयोग गरिएको उदाहरण हो ।’