एट्लेटिकोलाई पछार्दै रियल ला लिगाको शीर्ष स्थानमा

१९ पुष, एजेन्सी । रियल मड्रिड स्पेनिस ला लिगा फुटबलको शीर्ष स्थानमा उक्लिएको छ । शनिबार राति सेल्टा भिगोमाथि २–० गोलको जित निकाल्दै रियल शीर्ष स्थानमा उक्लिएको हो ।

रियलको मैदानमा टोलीलाई जिताउन लुकास भास्कवेज र मार्को एसेन्सियोले गोल गरे । खेलको छैटौं मिनेटमा भास्केजले गोल गर्दै रियललाई सुरुआती अग्रता दिलाएका थिए । उनले एसेन्सियोको पासमा गोल गरेका थिए ।

५३औं मिनेटमा एसेन्सियोले गोल गरे । भास्क्वेजको पासमा गोल गर्दै उनले रियलको सहज जित सुनिश्चित गरे । जितसँगै १७ खेलमा ३६ अङ्क जोड्दै रियल शीर्ष स्थानमा उक्लिएको हो । दोस्रो स्थानमा रहेको एथ्लेटिको मड्रिडसँग ३५ अङ्क छ । एथ्लेटिकोले रियलभन्दा तीन खेल कम खेलेको छ ।