लाहान मालपोतमा विस्फोटमा संलग्न २ जना पक्राउ

१७ चैत, सिराहा । सिराहा प्रहरीले लाहान मालपोतमा विस्फोट गराएको आरोपमा २ जनालाई नियन्त्रणमा लिएको छ । घटनाको १७ दिनपछि उनीहरूलाई प्रदेश प्रहरी कार्यालय र सिरहा प्रहरीको विशेष टोलीले सोमबार सुखिपुर नगरपालिका-५ बाट पक्राउ गरेको हो।

पक्राउ पर्नेमा जिल्लाकाे सुखीपुर नगरपालिका–५ का २५ वर्षका रामरिझन यादव र सिराहाकै लक्ष्मीपुर पतारी गाउँपालिका–३ का २६ वर्षका अभिमन्यू गिरि रहेका छन्।

गत चैत १ गते मालपोत कार्यालयमा विस्फोट हुँदा कर्मचारी र सेवाग्राही गरी ८ जना घाइते भएका थिए । उक्त घटनाको जिम्मेवारी तराई जनतान्त्रिक मुक्ति मोर्चा ‘गोइत’ समूहले लिएको थियो । उनीहरु यसअघि पनि आपराधिक काममा संलग्न भएको पाइएको प्रहरीले बताएको छ ।