ओलीलाई घेर्न अघि सरे माधव नेपाल

२२ बैशाख, काठमाडौं । प्रधानमन्त्री केपी ओलीले हठात् रुपमा बैशाख २७ गते प्रतिनिधिसभाबाट विश्वासको मत लिने निर्णय गरेपछि प्रतिपक्षी दलहरुमा हलचल आएको छ । ओलीको यो निर्णय असल नियतका साथ आएको हैन भन्ने विश्लेषण प्रतिपक्षी दलहरुको रहेको छ ।

प्रतिपक्षी मात्र होइन, आफ्नै दलका असन्तुष्ट नेताहरुको धारणा पनि त्यस्तै रहेको छ । झलनाथ खनाल र माधवकुमार नेपाल पक्षका नेताहरुको बुझाई अलि फरक छ । प्रतिपक्षी दलमा भन्दापनि आफ्नै दलका असन्तुष्ट नेताहरुलाई तह लगाउने गलत मनसायले ओलीले यस्तो प्रस्ताव प्रस्तुत गरेको ठम्याई यो समूहको रहेको छ । त्यसैले ओली सरकारको बहिर्गमन नेपाली कांग्रेसका लागि भन्दा झलनाथ – माधव पक्षका लागि बढी जरुरी छ ।

ओलीले संसद्बाट वहुमत सिद्ध गरेपनि खनाल – नेपाल समूहका नेताहरुलाई कारबाही गर्ने नै बुझेपछि परिस्थिति जटिल बन्न थालेको छ । ओली सकेसम्म वहुमत लिने नसके अर्ली इलेक्सनमा जाने दाउमा छन् । यी दुबै विकल्पमा ओलीले खनाल–नेपाल समूहलाई लोप्पा नै ख्वाउने हुन् ।

वहुमन सिद्ध गर्ने अवस्था आउँदा पनि कारबाही गर्ने नआए त झनै पार्टीबाटै निकाल्ने उनको दाउ हो । कदाचित माधव नेपाल पक्षले ओलीलाई मत दियो नै भने पनि वहुमत जुट्ने अवस्था बलियो छैन । जनता समाजवादी पार्टीको महन्थ ठाकुर पक्षले मात्र चाहेर ओलीलाई चाहिने मत जुट्ने देखिन्न । साथै, जसपाको कार्यकारिणी परिषदको अंकगणित पनि ठाकुरका लागि सुखद छैन । त्यसैले भोलि पदमुक्त हुने जोखिम मोलेर ठाकुरले भनेकै भरमा ओलीलाई मत जाने सम्भावना पनि झिनो देखिन्छ ।

यो अवस्था देखिएकाले प्रतिपक्षी दलहरु अब ओलीलाई घेर्ने दाउमा छन् । ओलीले जसरी पनि सत्ता आफैंले चलाउने अभिलाषा देखाएकाले विपक्षीले नयाँ रणनीति बनाउने भएका हुन् । वैशाख २७ गते अगावै प्रतिनिधिसभामा ओली विरुद्ध अविश्वास प्रस्ताव दर्ता गर्ने । यसो गर्दा ओलीले अल्पमतको सरकार बनाउने सम्भावना रोक्न सकिन्छ । किनभने ओलीले सत्ताका लागि जस्तोसुकै कदम चाल्न सक्ने रहेछन् भन्ने दृष्टान्त लुम्बिनी र गण्डकी प्रदेशबाट दिइसकेका छन् । यी परिघटनाले कांग्रेस सभापति शेरबहादुर देउवा पनि हच्किएका छन् । अब उनी पनि ओलीलाई घेर्ने नै दाउमा उभिएका छन् ।

यसै प्रयोजनका निम्ति देउवाकै सकृयतामा हिजो महाराजगञ्जस्थित प्रमोदशम्शेर राणाको घरमा देउवाले प्रतिपक्षी दलका नेताहरुको गोप्य भेला राखे । उक्त भेलामा माधव नेपालसमेत सहभागी थिए । भेलामा माओवादी केन्द्रका अध्यक्ष पुष्पकमल दाहाल ‘प्रचण्ड’ र जसपा अध्यक्ष उपेन्द्र यादवसमेत उपस्थित थिए ।

भेलामा देउवाले एमाले नेता नेपालको पोजिसन क्लियर गर्न चाहे । उनले ओलीलाई हटाउन कुन हदसम्मको साथ र सहयोग दिनुहुन्छ भनी पटक पटक जिज्ञाशा राखेको स्रोतको भनाई छ । जवाफमा नेता नेपालले आजसम्म साथीहरुसँग छलफल गरेर मात्रै यकिन गर्न सकिने बताएका थिए । ओलीले आफूहरुलाई पार्टीबाट निष्काशन नै गर्ने निचोड निकालिसकेको जानकारी पाएकोले प्रतिवाद गर्न भएपनि उनलाई सत्ताच्यूत गराउने आफ्नो रणनीति रहेको उनले बताएका थिए ।

हिजोको छलफल पछि आज पनि नेताहरु भेला भएका छन् । जसपा अध्यक्ष यादवको निवासमा अहिले नेताहरु छलफलमा जुटेका छन् । उक्त भेलामा नेता नेपाल र प्रचण्ड सहभागी भएपनि देउवा भने आइनपुगेको स्रोतले बतायो । आज नेता नेपालले आफ्नो पोजिसन क्लियर गरेभने भोलिसम्ममा प्रधानमन्त्री ओलीविरुद्ध प्रतिनिधिसभामा अविश्वास प्रस्ताव दर्ता गर्ने तयारी विपक्षीहरुले गरेका छन् । यसको टुंगो लगाउने का मभने फेरि पनि नेपालकै काँधमा आइपरेको छ । जसपा दुई भागमा विभाजित नभएको अवस्थामा भने नेपाल पक्षको सहयोग बिना पनि ओलीलाई पदमुक्त गर्न सकिने अवस्था थियो ।