ओली पक्षको बैठक बालुवाटारमा

९ असार, काठमाडौं । सर्वाेच्च अदालतले एकपछि अर्काे झड्का दिनेगरी फैसला गर्न थालेपछि प्रधानमन्त्री केपी ओली विचलित देखिएका छन् । हिजै मात्र जेठ २१ र २७ गते गरेको मन्त्रिपरिषद पुनर्गठनलाई सर्वोच्च अदातलले असंवैधानिक ठहर गर्दै अन्तरिम आदेश जारी गरेपछि ओली अत्तालिएका छन् ।

सर्वाेच्चको फैसला सार्वजनिक भएलगत्तै उनले पदमुक्त भएका सबै मन्त्रीहरुलाई बालुवाटारमा डाकेर अनौपचारिक बैठक गरे । त्यहाँ पनि ओलीले सर्वाेच्चले अनावश्यक राजनीति गरेको भन्दै रोष प्रकट गरेका थिए । बैठकमा सहभागी पदमुक्त मन्त्रीहरुलाई तत्काल मन्त्री निवास र सरकारी गाडी नछाड्न निर्देशन दिए ।

तर सर्वाेच्चले पदमुक्त गरिसकेका मन्त्रीहरुलाई सरकारी सुविधा प्रयोग गर्न निर्देशन दिएर प्रधानमन्त्रीले अदालतको अपहेलना गरेको आरोप एमाले वृत्तमै लगाइएको छ । पदमुक्त भएका मन्त्रीहरुलाई बैकल्पिक उपाय सोचिने भन्दै ओलीले आश्वास्त पार्न खोजेका छन् । जुन संविधान र नैतिकताका हिसावले गलत हो ।

अदालतले श्रृँखलावद्ध रुपमा सरकारी निर्णयमा बन्देज लगाउन थालेपछि अब कसरी अगाडि बढ्ने भन्ने सन्दर्भका छलफल गर्न ओलीले आफू निकट नेताहरुलाई बालुवाटार बोलाएका छन् ।

ओलीको सरकारी निवासमा छलफल जारी छ । बैठकमा नेताहरु इश्वर पोखरेल, सुभाषचन्द्र नेम्बाङ, प्रदीपकुमार ज्ञवाली लगायत सहभागी छन् । ओलीले अब प्रतिनिधिसभा पनि पुनस्थापना हुने अड्कल गरेका छन् । हिजै उनले यस्तो आसय प्रकट गरिसकेका छन् ।

आजको छलफलमा पुनस्थापना भयो भने कसरी जादाँ उचित हुन्छ भनेर वहस चलाएका छन् । स्रोतका अनुसार ओली निकट सबै नेताले अझै भिडेरै जाने मनस्थिति बनाएका छन् । ओली पनि अब निकासका लागि राजीनामा दिने भन्दा सबैसँग पौंठाजोरी खेलेरै अगाडि बढ्ने पक्षमा देखिएका छन् ।