नेपाललाई चीनका राष्ट्रपति सीको सन्देश ‘विकासको मोडल आफै तयार गर्नू’

४ जेठ, काठमाडौं । चीनका राष्ट्रपति सी चिनफिङले नेपालको आर्थिक विकासको मोडले आफै तयार गर्न नेपाल सक्षम रहेको कुरा हालै सम्पन्न स्थानीय तह निर्वाचनले देखाएको बताएका छन् । उनले निर्वाचन सम्पन्न गरेकोमा नेपाल सरकारलाई धन्यवाद पनि दिएका छन् ।

नेपालका लागि चिनियाँ राजदूत होउ यान्छीले बुधबार गृहमन्त्री बालकृष्ण खाँणलाई भेटेर चीनका राष्ट्रपतिले पठाएको सन्देश सुनाएकी छन् । यान्छीले नेपालले आफ्नो विकासको मोडल आफै तयार गर्न सक्ने र यसका लागि नेपाललाई अरुको साथ आवश्यक नभएको धारणा चिनियाँ सरकारको रहेको बताएकी छन् ।

गृहमन्त्री खाँणसँग राजदूत यान्छीले भारतीय प्रधानमन्त्री नरेन्द्र मोदीको लुम्बिनी भ्रमणको दोस्रो दिन बुधबार सन्देशसहित भेटवार्ता गरेकी हुन् । त्यसक्रममा राजदूत यान्छीले नेपाली जनता र सरकारले आफ्नो विकासको मोडेल आफैँ तय गर्ने भन्दै नेपालले तयार गर्ने मोडेलमा चीनको सधैँ सहयोग र सद्भाव रहने राष्ट्रपति सीको धारणा सुनाएकी थिइन् ।

गृह मन्त्रालयका अनुसार भेटमा दुई देशबीचको आपसी सम्बन्ध र सहयोग आदानप्रदानका विविध विषयमा छलफल भएको थियो । राजदूत यान्छीले स्थानीय तह निर्वाचन सम्पन्न गरेकामा चिनियाँ राष्ट्रपति सी चिनफिङका तर्फबाट प्रधानमन्त्री शेरबहादुर देउवालाई बधाई ज्ञापन गरेको पनि गृहमन्त्रीमार्फतको जानकारी गराएकी छन् ।

भेटमा गृहमन्त्री खाँणले स्थानीय निर्वाचन सम्पन्न गरेर सरकार अब बजेट निर्माणको प्रक्रियामा लागेको बताएका थिए । उनले चीनले शान्ति, स्थिरता, विकास र समृद्धिमा अहिलेसम्म निरन्तर गरेको सहयोगका लागि धन्यवाद दिँदै आगामी दिनमा पनि नेपालको विकास र समृद्धिमा सहयोगको निरन्तरता हुने विश्वास व्यक्त गरका छन् ।