भारतमा नोटबन्दीको निर्णयलाई वैधानिकतासँगै नेपाली बैंकमा रहेका करोडाैं भारु मूल्यहीन

१८ पुष, काठमाडौं । भारत सरकारका प्रधानमन्त्री नरेन्द्र मोदीले सन् २०१६ मा लिएको पाँच सय र एक हजार दरका नोटमाथि प्रतिबन्ध लगाउने निर्णयलाई त्यहाँको सर्वोच्च अदालतले सोमबार वैधानिकता दिएसँगै नेपालभित्र थन्किएका सो दरका भारु नोट खोस्टामा परिणत भएको छ ।

नोटबन्दीको निर्णय सही भएको भारतको सर्वोच्च अदालतको फैसाला आउँदा नेपालको बैंकिङ प्रणालीमा रहेको प्रतिबन्धित ५०० र एक हजार दरका करिब ५ करोड ६ लाख भारतीय रुपैयाँ खेर जाने निश्चितजस्तै बनेको छ ।भारतीय

सर्वोच्चको फैसलासँगै नेपालसँग रहेको उक्त भारतीय रुपैयाँ कागजको खोस्टो बन्ने अवस्था बनेको नेपाल राष्ट्र बैंकका एक अधिकारीले बताए ।

प्रतिबन्ध लगाएदेखि नै नेपालका बैंकिङ प्रणालीमा रहेका ती नोटबारे भारतको केन्द्रीय बैंकलाई पटकपटक पत्राचार गरेपनि सुनुवाइ नभइरहेको ती अधिकारीले बताए । बेवास्त भइरहेकै अवस्थाबीच सर्वोच्च अदालतको आदेश आएको हो ।

राजस्वछली र कालोधन नियन्त्रणका लागि भन्दै सन् २०१६ मा ५०० र एक हजार दरका नोटमा भारत सरकारले प्रतिबन्ध लगाएको थियो । सरकारको उक्त निर्णयविरुद्ध भारतको सर्वोच्च अदालतमा रिट परेको थियो ।

उत्त रिटलाई नयाँ दिल्लीस्थित सर्वोच्च अदालतले सोमबार खारेज गर्ने निर्णय गरेको हो । खारेजीको फैसलापछि नेपालभित्र रहेका भारतीय नोट कारोबारमा ल्याउन सकिने सम्भावना समाप्त भएको छ ।