अर्थतन्त्रका चुनौती सामना गर्ने उपायको खोजिमा सरकार लागेको छः अर्थमन्त्री

२९ फागुन, काठमाडौं ।  अर्थमन्त्री जनार्दशन शर्माले अहिले देशको अर्थतन्त्रमा देखिएको चुनौतिपूर्ण अवस्थालाई न्युनिकरण गर्ने विभिन्न उपायहरुको खोजिमा सरकार रहेको बताएका छन् । अर्थमन्त्री शर्माले भन्सार प्रभावित हुने भएपनि केही समयको लागि केही वस्तुको आयातमा मार्जिन राखिएको बताएका छन ।

आइतबार भन्सार विभाग, त्रिपुरेश्वरमा आयोजित भन्सार व्यवस्थापन गोष्ठीमा उनले यो मार्जिन सधैंका लागि राखिएको र स्थिति सामान्य भएपछि भन्सार प्रणालीले नियमित काम गर्ने बताए । अर्थतन्त्रमा देखिएको चुनौती समाधान गर्न आयातमा मार्जिनको व्यवस्था अहिलेको लागि आवस्यक भएको उनको भनाई छ ।

अर्थमन्त्री शर्माले आयातमा गरिएको कडाईले भन्सार राजस्व असुली प्रभावित भएपनि मेहिनत गरेर लक्ष्यमा पुग्न निर्देशन दिए । उनले भन्सार कार्यालयमा देखिएका समस्या समाधान गर्न, नीतिबाट सृजित नयाँ चुनौतीको सामना गर्दै राजस्व परिचालनमा प्रभावकारी बनाउन उचित कदम चाल्ने बताए ।

वस्तु आयातमा गरिएको वर्गीकरण सम्बन्धी व्यवस्थाले व्यवसायीमा असन्तुष्टि देखिएकाले त्यसलाई पनि छलफलको माध्यमबाटै समाधानको सुत्र पहिल्याउन उनले मातहतका निकायलाई निर्देशन दिए ।

उनले भन्सार कार्यालयमा प्रयोग हुने भेहिकल स्क्यानिङ सम्बन्धी निर्देशिका बन्दै गरेको र चाँडै कार्यान्वयनमा आउने समेत जानकारी गराए । व्यापारलाई सहजीकरण गर्दै राजस्व परिचालनमा अगाडी बढ्न उनले कर्मचारीलाई निर्देशन दिए ।

भन्सार विभागका उपमहानिर्देशक आनन्द काफ्लेले माघ मसान्तसम्म तीन खर्ब ५ अर्ब राजस्व संकलनको लक्ष्य भएपनि आयातमा गरिएको कडाइका बाबजुत तीन खर्ब ८ अर्ब राजस्व संकलन भएको जानकारी गराए । यो गत वर्ष सोही समयको तुलनामा २९ प्रतिशत राजस्व संकलन बढी हो ।