जसपा बैठकमा उम्मेदवारको मापदण्डसहित निर्वाचन निर्देशिका प्रस्तुत

२९ फागुन, काठमाडौं ।  जनता समाजवादी पार्टी नेपाल (जसपा) को केन्द्रीय समिति बैठकमा स्थानीय तह निर्वाचनमा उम्मेदवारका मापदण्डसहितको निर्देशिका पेश गरिएको छ । पार्टीका कार्यकारिणी समिति सदस्य नवराज सुवेदीले निर्देशिका प्रस्तुत गरेको निर्देशिकामा पार्टीको तर्फबाट स्थानीय तहको उम्मेदवार बन्नका लागि अवधारणाहरु तय गरिएको छ ।

बैठकमा पार्टीका नेता रकम चेमजोङले समसामयिक राजनीतिक प्रस्ताव प्रस्तुत गरेका छन् । जसमा आगामी चुनावसम्म अहिलेको सत्ता गठबन्धन कायम रहने प्रस्ताव गरिएको छ । यस्तै स्थानीय तहको चुनाव मिति घोषणाको स्वागत, लाल आयोगको प्रतिवेदन सार्वजनिक गर्दै त्यसलाई कार्यान्वन गर्न प्रस्तावमार्फत माग गरिएको छ ।

आगामी निर्वाचनमा उम्मेदवार बन्नका लागि पार्टीको सिद्धान्त प्रति प्रतिवद्ध भएको हुनपर्ने, पार्टीमा संगठित र सक्रिय भएको हुनुपर्ने, समाजिक काममा सक्रिय भएको हुनुपर्ने, स्वच्छ छविको हुनुपर्ने, भुगोल बुझेको हुनुपर्ने लगायतका योग्यता प्रस्ताव गरिएको छ ।

निर्देशिकामा उम्मेदवारको चयन स्थानीय तहबाट गर्ने, पालिका तहबाट ३ जनाको नाममा छलफल गरी त्यसमध्ये एकजना उम्मेदवार चयन गर्ने भनिएको छ । पालिका तहमा सहमति नभए माथिल्लो निकायमा पठाइने निर्देशिकामा उल्लेख गरिएको छ । निर्देशिका केन्द्रीय कमिटीले पास गरेपछि कार्यान्वयनमा जानेछ ।