लामिछानेको उम्मेदवारी बदरको माग गर्दै मुख्यनिर्वाचन अधिकृतको कार्यालयमा उजुरी

२१ चैत, चितवन । चितवन क्षेत्र नम्बर २ का राष्ट्रिय स्वतन्त्र पार्टी (रास्वपा)का उम्मेदवार रवि लामिछानेको उम्मेदवारी बदरको माग गर्दै निर्वाचन अधिकृतको कार्यालयमा उजुरी दर्ता भएको छ ।

सिन्धुलीका युवराज पौडेलले चितवन क्षेत्र नम्बर २ स्थित निर्वाचन अधिकृतको कार्यालयमा मंगलबार उजुरी दर्ता गराएका हुन् ।

उनले नेपालको संविधानले व्यवस्था गरेको विदेशी आवासीय अनुमतिपत्र त्यागको अवधि पूरा नभएको दाबीसहित उजुरी दर्ता गराएका हुन् ।

‘नेपालको संविधान २०७२ को धारा २९१ ले विदेशको आवासीय अनुमतिपत्र त्याग गरेको व्यक्तिले कम्तीमा ३ महिना अवधि व्यतित नभइ निर्वाचनमा उम्मेदवार हुन रोक लगाएको’ उजुरीमा उल्लेख गरिएको छ ।

उजुरीकर्ता पौडेलका अनुसार लामिछानेले माघ १५ गतेमात्रै जिल्ला प्रशासन कार्यालय काठमाडौंबाट नागरिकता पुनर्प्राप्ति गरेको र सो अघि उनले निस्सा बुझाएको नदेखिएकाले देखिएकाले उम्मेदवार बन्न अयोग्य रहेको जिकिर गरिएको छ ।

उजुरीमा संविधान २०७२ को धारा २९१ बमोजिम उम्मेदवार योग्य नरहेको जिकिर गर्दै लामिछानेको उम्मेदवारी बदर गरी उम्मेदवार बन्न अयोग्य रहेको घोषणा गर्न माग गरिएको छ ।

लामिछानेले सोमबार मात्र चितवन २ मा वैशाख १० गते हुने उपनिर्वाचनका लागि उम्मेदवारी दर्ता गराएका थिए । उनले उजुरीमा आवासीय अनुमतिपत्र त्यागको अवधि लगायत ३ वटा कारण अगाडि सारेका छन् ।

पौडेलले लामिछानेको नागरिकता सम्बन्धी दायर गरेको मुद्दामा सर्वोच्च अदालतले गएको माघ १३ गते सांसद पद खारेज गरिदिएपछि निर्र्वाचन आयोगले उपनिर्वाचन गराउन लागेको हो ।

पौडेलले छामिछानेमाथि दोहोरो राहदानीसम्बन्धी विषयमा पनि सर्वोच्चमा सोमबार मात्र मुद्दा दायर गराएका छन् । सो मुद्दामा आज न्यायाधीश अनिलकुमारा सिन्हाको एकल इजलासमा सुनुवाइका लागि पेसी तोकिएको छ ।