मविरूद्ध परेकाे मुद्दाले पार्टीकाे यात्रालाई केही फरक पर्दैनः लामिछाने

२१ चैत, चितवन । राष्ट्रिय स्वतन्त्र पार्टी (रास्वपा)का सभापति एवं चितवन २ मा प्रतिनिधिसभा उपनिर्वाचनका उम्मेदवार रबि लामिछानले आफ्ना कारण कोही पनि पीडित नभएको बताएका छन् ।

चुनावी प्रसारप्रसारका क्रममा घरदैलो कार्यक्रममा आयोजित कार्यक्रममा मंगलबार मतदाताहरुलाई सम्बोधन गर्दै उम्मेदवार लामिछानेले आफूबाट कोही पनि पीडित नभएको र यस्तो अस्वस्थामा पनि बद्नाम गराउने र सिध्याउने सुनियोजित तवरले कोही व्यक्तिलाई अगाडि सारेर पटकपटक मुद्दा र उजुरी दर्ता गराउँदै आइरहेको बताए ।

‘मेरो कारण एकजना पनि पीडित बनेको छैन, तैपनि बारम्बार मुद्दा उजुरी र दर्ता गराउँदै हिँडेका छन् । मेरो कारण एक जना मात्र पनि पीडित भएको प्रमाण देखाउनुस् । जवाफ दिन तपाइँहरुसामु उभिएर जवाफ दिन तयार छु’ उनले भने ।

आफ्नो इमान र रास्वपाले हासिल गरिरहेको सफलतामा अत्तालिएकाहरुले पार्टी र पार्टी नेतृत्वप्रति गलत आक्षेप र दुष्प्रचार गरिरहेको उनको भनाइ थियो । दुष्प्रचारकै बीच रमेश खरेल र स्वर्णिम वाग्ले लगायत इमान्दार र प्रखर नेताहरुले रास्वपामा जोडिएर उपनिर्वाचनमा भाग लिइरहेको बताए ।

सभापति लामिछानेले सडक रेलिङ समेत नभाँची ६ महिनाको अवधिमा २० सांसद जितेर नेपाली राजनीतिमा लाग्दै आएको नातावाद र अर्थवादको कलंक पखाल्ने कामको सुरुवात गरेको दाबी गर्दै आगामी ५ वर्षमा बहु्मतको सरकार बनाउने क्षमतामा पुग्ने बताए । उनले वैशाख १० मा हुने ३ वटै क्षेत्रमा चुनाव जित्ने दाबी गरे ।

उजुरी र मुद्दाले नेपाली समाजलाई समृद्ध र भ्रष्टाचारमुक्त बनाउने अभियानलाई केही फरक नपर्ने उनको भनाइ थियो । दोहोरो नागरिकताको विषय सर्वोच्चबाट टुंगो लागेपनि दोहोरो राहदानीसम्बन्धी विषयलाई लिएर सोमबार सर्वोच्च अदालतमा मुद्दा र नागरिकताको फैसला भएको अवधिलाई लिएर चितवन २ को मुख्य निर्वाचन अधिकृतको कार्यालयमा लामिछानेविरुद्ध मंगलबार उजुरी दर्ता भएका छन् । उम्मेदवारविरुद्ध उजुरी दिन आजको समय तोकिएको थियो ।

कांग्रेसका वाग्ले रास्वपा प्रवेश गरेर तनहुँ १ र प्रहरीका पूर्व डीआईजी खरेल रास्वपाबाटै सप्तरी २ बाट प्रतिनिधिसभा उपनिर्वाचन लड्दैछन् ।

दोहोरो नागरिकतासम्बन्धी परेको मुद्दामा सर्वोच्च अदालतले गएको माघ १३ गते लामिछानेको संघीय सांसद पद खारेज गरिदिएपछि निर्वाचन आयोगले आउँदो वैशाख १० मा चितवन २ मा लगायत ३ क्षेत्रमा उपनिर्वाचन गराउँदैछ ।