मापदण्डपरीत निर्माणधीन समिट हाेटलमा संलग्नमाथि कारवाही गर्न संसदमा माग

२७ चैत, काठमाडौं । ललितपुरको कुपण्डोल हाइटमा समिट होटलका लागि निर्माणधीन रेसिडेन्सी मापदण्डविपरीत रहेको भन्दै सांसदहरुले छानबिन गरी दोषीलाई कारवाही सरकारसँग माग गरेका छन् । 

चौधरी ग्रुपको लगानीमा निर्माण सुरु भएको रेसिडेन्सियल हाेटलका संरचनाका कारण वरपरका घर र सडक भासिएर ठूलो क्षति पुगेको भन्दै उनीहरुले सोमबार प्रतिनिधिसभाको बैठक दोषी पत्ता लगाएर निजमाथि कारवाही गर्न सरकारको ध्यानाकर्षण गराए । ठूलो संरचना निर्माण गर्दा पनि नक्सा  पास नगरिएको र वातारणीय प्रभाव मूल्यांकन (ईआईए) समेत नगरिएको भन्दै सांसदहरुले सरकारलाई प्रश्नसमेत गरे । 

राप्रपाकी सांसद रोशन कार्कीले कुपण्डोल हाइटमा मापदण्ड मिचेर समिट होटलले ठूलो संचरचना बनाइरहेको भन्दै निर्माणमा लंलग्नहरुलाई कडा कारवाही गर्न माग गरिन् । अवैध तरिकाले भवन निर्माणको काम सुरु हुँदा समेत स्थानीय तहले थाहा नपाउनु भ्रष्टाचारको गन्ध आएको बताइन् । 

राष्ट्रिय स्वतन्त्र पार्टीका सांसद असिम शाहले पनि उक्त भवन निर्माणमा संलग्नलाई कारबाही गर्न माग गरे । उनले नियमविपरीत ठूलो भवन बन्दा समेत ललितपुर महानगरले कुनै चासो नदिएको भन्दै आपत्ति जनाए । स्थानीयको उठीबास लगाउने गरी भइरहेको निर्माण कार्य तत्काल रोकेर छानबिन गर्न माग गरे । 

होटलका लागि बिल्डिङ बनाउन सुरु गरेको केही दिनमै शुक्रबार राति वरपरका घर भासिएको र सडक समेत कोल्टे परेपछि विरोध सुरु भएको छ ।

चौधरी समूहका अध्यक्षसमेत रहेका कांग्रेस सांसद् विनोद चौधरी, पूर्वमन्त्री तथा एनई समूहका अध्यक्ष रविभक्त श्रेष्ठ र समिट समूहको ६ अर्ब रूपैयाँ लगानीमा ‘द समिट होटल एन्ड रेसिडेन्सेस्’ नामबाट १६ तलाकाे अपार्टमेन्ट होटल बन्न लागेको हो । 

यद्यपि सोमबार होटलले एक प्रेस विज्ञप्ति जारी गर्दै रेसिडेन्सी निर्माणका लागि खनिएको खाडलका कारण स्थानीयको आवासमा सामान्य असर पुगेको जनाएर घटनालाई सामान्यकीकरण गर्ने कोशिस गरेको छ ।