कुल बेरूजु ५ खर्ब ८७ अर्ब पुग्याे

३० चैत, काठमाडौं । नेपालमा संघ, प्रदेश र स्थानीय तहको यस वर्षकाे एकमुष्ट बेरूजु १ खर्ब १९ अर्ब ७७ करोड रुपैयाँ रहेको छ ।

महालेखा परीक्षकको कार्यालयले सार्वजनिक गरेको ६० औं प्रतिवेदन अनुसार आर्थिक वर्ष २०७८÷७९ मा सो रकम बराबरको बेरूजु देखिएको हो । याेसँगै कुल बेरूजु ५ खर्ब ८७ अर्ब पुगेकाे छ ।

बेरूजुलाई असुल गर्नुपर्ने, नियमित गर्नुपर्ने र पेश्की गरी ३ वर्गमा वर्गीकरण गरिएको छ । असुल गर्नुपर्ने बेरूजुअन्तर्गत हिनामिना र मस्यौट, हानी नोक्सानी र अन्य असुल गर्नुपर्ने बेरूजु उल्लेख गरिएको छ । 

यस्तै, नियमित गर्नुपर्ने बेरूजुमा अनियमित भएको, प्रमाण कागजात नपुगेको, जिम्मेवारी नसारेको र शोधभर्ना नलिएको राखिएकाे छ । पेश्कीमा कर्मचारी, मोबिलाइजेसन र अन्य पेश्कीमा वर्गीकरण गरिएको छ । 

संघीय सरकारी कार्यालयको बेरूजु ५६ अर्ब ३१ करोड, प्रदेशमा ७ अर्ब २० करोड र स्थानीय तहमा ४२ अर्ब ८८ करोड र समिति तथा अन्य संस्थाको ११ अर्ब ९७ करोड बेरूजु देखिएको महालेखा परीक्षकको कार्यालयले जनाएकाे छ ।

अद्यावधिक बेरूजु गत वर्षको भन्दा २१.४५ प्रतिशतले बढेको जनाइएकाे छ । आव २०७७/७८ सम्म ४ खर्ब ८३ अर्ब ५९ करोड बेरूजु रहेको थियो ।