रविले जिते चितवन- २ मा फेरि उपचुनाव हुन्छ: भट्टराई

३ वैशाख, चितवन ।  नेकपा एमालेका सचिव योगेश भट्टराईले चितवन क्षेत्र नं. २ बाट रवि लामिछाने पुनः निर्वाचित भए यो क्षेत्रमा फेरी उपनिर्वाचन हुने बताएका छन् । उनले रवि लामिछानेको नाम उल्लेख नगरी यो क्षेत्रको चुनावी परिणाम गत मंसिरको जस्तो आए फेरि उपचुनाव हुनसक्ने बताएका छन् । चुनाव प्रचारका लागि चितवन आएका एमाले सचिव भट्टराईले प्रेस चौतारी नेपालले भरतपुरमा आयोजना गरेको पत्रकार सम्मेलनमा मतदातालाई फेरी उपनिर्वाचन नहुने गरी मतदान गर्न आग्रह गरे । 

गत मंसिर ४ को संसदीय निर्वाचन चितवन क्षेत्र नम्बर २ बाट विजयी भएका रास्वपा सभापति रवि लामिछाने नागरिकता सम्बन्धी विवादमा पदमुक्त भएपछि यही वैशाख १० गते उपनिर्वाचनमा रवि पुनः उम्मेदवार बनेका छन् । सत्ता गठबन्धनको तर्फबाट नेपाली कांग्रेसका जितनारायण श्रेष्ठ र नेकपा एमालेका रामप्रसाद न्यौपाने उम्मेदवार छन् । भट्टराइले रास्वपाका सभापति रवि लामिछानेले देशको कानून उल्लंघन गर्दा चितवन २ मा उपचुनाव गर्नुपरेको बताए । 

भट्टराइले भने, ‘अहिले पनि चितवन २ मा विगतको जस्तो नतिजा आए, दोस्रोपटक उपचुनाव हुन्छ । यहाँका जनतालाई दुःख दिने काम गर्नु हुँदैन । मतदाताको केही दोष छैन । दोष त आफ्ना कागजात ठिकसँग नराख्नेको छ, जानीजानी गल्ती गरेको हो, समाजलाई ढाँटेको त उहाँले हो ।’ उनले रवि लामिछाने माथि फेरी दुद्दा पर्ने र पहिलेकै अवस्था आउने संकेत गरे ।

उनले मंसिर ४ मा भएको गल्तीलाई जनताले वैशाख १० मा सच्चाउनुपर्ने बताए । चितवन २ मा एकीकृत समाजवादी र माओवादीको आफ्नो उम्मेदवार नभएकाले तीन दलको भिण्डन्त छ  । भट्टराईले लामिछानेका समर्थकहरु असहिष्णु हुँदै गएको बताए । यस्ता प्रवृतिको काँधमा चढेर हिँडेको ब्यक्तिबाट कस्तो मुलुक र समाजको परिकल्पना गर्ने भन्दै मतदातालाई विचार गरेर मत दिन आग्रह गरे । 

भट्टराइले केही नराम्रो काम गरे पनि देशका लागि पुराना दलहरुको अस्तित्व कायम रहेको बताए । मतदाताहरु हावामा हैन बास्तविकतामा रहेर मतदानमा सहभागि हुनुपर्ने बताए । चितवनको योक्षेत्रलाई सधै अस्थिर बनाउने कि नबनाउने भन्ने हात यही क्षेत्रका मतदातको रहेकाले फेरी उपनिर्वाचन नहुने गरी मतदान गर्नुपर्ने बताए । उनले मतदाताले विचार नपुर्याए त्यसको असर यस  क्षेत्रका विकासमा पनि पर्ने भट्टराईको भनाइ छ ।