दोरम्बा शैलुङमा काेभिड १९ विरूद्ध तेस्रो र चौथो डोज लगाइँदै

११ वैशाख, मन्थली । जिल्लाको दोरम्बा शैलुङ गाउँपालिकाले कोभिड १९ विरुद्ध बुस्टरको तेस्रो र चौथो डोज (मात्रा) लगाउने भएको छ । 

पालिका कार्यालय टोकरपुरले आइतबार एक सूचना जारी गर्दै कोभिड १९ विरुद्धको पहिलो र दोस्रो खोप लगाइसकेका नागरिकलाई बुस्टर डोज दिने जनाएको छ । 

सूचना अनुसार खोप यही वैशाख १३ र १४ गते दुई दिन खोप संचालन गरिनेछ । उक्त दिन गाउँपालिकाको ७ नं. वडामा संचालन गरिने लखनपुर स्वास्थ्य चौकी प्रमुख एवं जनस्वास्थ्य निरीक्षक सिमन राय यादवले जनाएका छन् ।

उक्त दिन ५५ वर्षमाथिका पहिलो र दोस्रो डोज लगाइसकेका नागरिकलाई तेस्रो बुस्टर र तेस्रो बुस्टर लगाइसकेका नागरिकलाई चौथो बुस्टर लगाइने आइतबार जारी सुचनामा जनाइएको छ । पीफाइजर खोप लगाइने र खोप समय बिहान १० बजेदेखि दिउँसो ४ बजेसम्म दिइने तथा स्थान वडा कार्यालय थापागाउँमा तोकिएको सूचनामा उल्लेख छ ।

पछिल्लो समयमा मुलुकभर कोभिड १९ को संक्रमण दर बढ्दै गइरहेको जनाउँदै स्वास्थ्य मन्त्रालयले बुस्टर डोज लगाउन छुटेका नागरकलाई खोप लगाउन आग्रह गर्दै आएको छ । तेस्रो डोज अर्थात पहिलो बुस्टर लगाइसकेकाहरुलाई चौथो बुस्टर खोप लगाउन अनुरोध गरेको छ ।

संक्रमणबाट पछिल्लो हप्तादेखि दैनिक एकजनाको मृत्यु हुने क्रम चलिरहेको छ ।