लोकतन्त्रप्रति नागरिक उत्साहित, भ्रष्टाचार नियन्त्रणमा जनता र सरकार एक: राष्ट्रपति

५ जेठ, काठमाडौं । राष्ट्रपति रामचन्द्र पौडेलले प्रधानमन्त्री पुष्पकमल दाहाल ’प्रचण्ड’ को सरकारको पहिलो बैठकले भ्रष्टाचार नियन्त्रणमा शून्य सहनशीलता अपनाउने निर्णय गरेर कार्यान्वयन गर्न थालसँगै जनतामा लोकतन्त्रप्रति भरोसा बढेको बताएका छन् । 

शुक्रबार संघीय संसदको संयुक्त बैठकमा सरकारको नीति तथा कार्यक्रम वाचन गर्दै उनले सरकारले कार्यभर सम्हालेको छोटो समयको उपलब्धि देखिन थालेको बताए । राज्य र लोकतन्त्रप्रति नागरिकको भरोसा र जागरुकता उत्साहजनक ढंगले बढेको उनको भनाइ छ । विधिको शासनप्रति जनताको भरोसा बढेको र  भ्रष्टाचार नियन्त्रणमा जनता र सरकार एकै ठाउँमा आएको पौडेलले जनाए ।

उनले सरकारले आगामी आर्थिक वर्षमा कर प्रणालीमा पुनरावलोकन गर्ने बताए । उनले सरकारले आगामी आर्थिक वर्षमा कर प्रणालीमा पुनरावलोकन गर्ने घोषणा गरे । राजस्व प्रशासनलाई थप सुदृढ र चुस्त बनाइने उनले बताए । विद्यमान कर प्रणालीमा पुनरावलोकन गर्ने उनको भनाइ छ । 

राजस्वको दायरा विस्तार गर्ने र सबै प्रकारका आर्थिक क्रियाकलापलाई औपचारिक प्रणालीमा आबद्ध गर्ने उनले घोषणा गरे । राजस्व चुहावट, न्यून बिजकीकरण, हुण्डी, अवैध कारोबारमा लगानी तथा राष्ट्रिय पूँजी पलायनमा कडाइ गर्ने सरकारको घोषणा छ ।