अदालत परिसरबाट हटाइएका उपप्राध्यापक प्रेम चलाउनेले थाले त्रिविमा आमरण अनसन

४ असार, काठमाडौं ।  त्रिभुवन विश्वविद्यालयका उपप्राध्यापक प्रेम चलाउन विश्वविद्यालयको भीसी कार्यालय अगाडि आमरण अनसन सुरु गरेका छन् । सोमबार दिउँसो काठमाडौं जिल्ला अदालतको मुख्य द्वारमा सुरु गरेका उनलाई प्रहरीले पक्राउ गरेर हटाएपछि उनले त्रिविको भिसी कार्यालय परिसरमा आमरण अनसन केही बेरअगाडि सुरु गरेका हुन् । 

उनीमाथि २०७७ मा त्रिवि कार्यालयमै मरणासन्न हुने गरी आक्रमण गर्ने नेविसंघका विद्यार्थीहरुको मुद्दालाई सरकारले फिर्ता लिने निर्णय गरेपछि फिर्ता नगर्न माग गर्दै आमरण अनसन सुरु गरेका हुन् । 

उनले मुलुकमा न्याय मरेको भन्दै कानून, न्याय र मानवअधिकारको रक्षाका लागि शान्तिपूर्ण आन्दोलनको बाटो अनसन राजेको बताएका छन् । मुद्दामा अन्तिम सुनुवाइका लागि भोलि मंगलबारका लागि काठमाडौं जिल्ला अदालतमा पेसी तोकिएको छ ।

२० असोज २०७७ मा नेविसंघका त्रिवि जिल्ला अध्यक्ष हरि आचार्य, सचिव योगेन्द्र रावल लगायतको समूहले उनीमाथि आक्रमण गरेको थियो । बेहास् अवस्थामा त्रिविभित्रै फेला पारी उद्धार गरी उनको स्वास्थ्योपचार गराइएको थियो । त्यसपछि उनले किटानी जाहेरी दिएका थिए ।