दोरम्बा शैलुङ गाउँपालिकाले लम्पी स्किनविरुद्ध साप्ताहव्यापी खोप अभियान चलाउने

२२ साउन, काठमाडौं । रामेछापको दोरम्बा शैलुङ गाउँपालिकाले पालिकाभित्र सप्ताहव्यापी रुपमा लम्पी स्किन रोगविरुद्ध खोप अभियान चलाउने भएको छ । पालिका प्रमुख नरेश महतोले एक सूचना जारी गर्दै चौपायामा महामारीको रुप लिइरहेको लम्पी स्किन रोगविरुद्ध पालिकाका ७ वटै वडामा यही साउन २५ गतेदेखि ३१ गतेसम्म ७ दिन खोप अभियान चलाउने जानकारी दिएका छन् । 

खोप लगाउनुपहिले वडाहरुमा संक्रमित अवस्थाका, संक्रमणबाट मरेका र संक्रमण नभएका  गाई, गोरु, राँगा, भैंसीको विवरण उप्लब्ध गराउन पनि सूचनामा भनिएको छ । खोप अभियान भेटेनरी अस्पताल तथा पशु सेवा विज्ञ केन्द्र सिन्धुलीको आयोजनामा संचालन हुने पनि जनाइएको छ । 

लम्पी स्किन रोगबाट पालिकाभित्र झण्डै ९० प्रतिशत किसानका चौपाया बिरामी परेको र त्यसमध्ये ४ प्रतिशत मरेको पालिकाको अनुमान छ । यकिन तथ्यांक भने पालिकासँग छैन । 

वडा नम्बर ४ मा अन्तर्गत साविकको गौश्वरा गाविस–१ टेक्सिङमा मात्र फूर्वा तामाङ र सिंबहादुर तामाङको एक/एक वटा गोरु र माया तामाङको एउटा गाई मरेको पाइएको छ । साविकको गौश्वरा गाविसलाई वडा नं. ४ बनाइएको हो । गोरु बिरामी परेका कारण सिंबहादुरले सशस्त्र प्रहरी बलमा रहेका छोरालाई बोलाएर आधा जति खेत खनेर धान रोपाइँ गरेका थिए । 

३६ भन्दा बढी घर धुरी रहेको टेक्सिंमा करिब २६ हल गोरु रहेको र हाल २ घरको मात्र गोरु बिरामी हुनबाट जोगिएको बताइन्छ । पालिकाका ७ वटै वडाका किसान राेगबाट पूर्णरूपमा प्रभावित भएकाे पालिकाले जनाएकाे छ ।