बालुवाटार जग्गा हिनामिना सन्दर्भमा म प्रधानमन्त्री हुँदा भएका सबै विवरण सीआईबीलाई दिएको  छुः भट्टराई

४ भदौ, काठमाडौं । पूर्वप्रधानमन्त्री तथा नेपाल समाजवादी पार्टीका अध्यक्ष डा. बाबुराम भट्टराईले ललितानिवास प्रकरणका सन्दर्भमा आफू प्रधानमन्त्री भएको समयमा भएका निर्णय र त्यसमा आफ्नो संलग्नता बारे नेपाल प्रहरीको केन्द्रीय अनुसन्धान ब्यूरो (सीआईबी) लाई सबै कुरा जानकारी गराएको बताएका छन् । 

सीआईबीले बालुवाटार जग्गा प्रकरणमा दोषी देखिएका पूर्वप्रधानमन्त्री र मन्त्रीहरूको बयान नलिई सरकारी वकिलको कार्यालयलाई प्रतिवेदन बुझाउन लागेको भन्दै आलोचना भइरहेका बेला भट्टराईले ट्वीटमार्फत आफूले सबै कुरा जानकारी दिएको बताएका छन् । भट्टराईले आइतबार अपरान्ह सीआईबीका अधिकारीहरूलाई आफ्नो निजी निवास टोखा बोलाएर आफूबारे उठेको प्रश्नहरूबारे जानकारी दिएको भनेका छन् । 

‘ललितानिवास प्रकरणमा मेरो पालाको मन्त्रिपरिषदको निर्णय सम्बन्धमा उठेका प्रश्नहरूबारे सत्य तथ्यको जानकारी मेरो सुरूदेखिको सार्वजनिक प्रतिबद्धता बमोजिम सीआईबीलाई दिएर आफ्नो कर्तव्य निर्वाह गरेको छु,’ भट्टराईले सोमबार बिहान एक ट्वीट सन्देशमार्फत् जानकारी दिएका छन् ।

सीआईबीलाई आफूले दिएको जानकारी बारे उल्लेख गर्दै डा. भट्टराईले लेखेका छन्, ‘यो मुद्दा सफल टुंगोमा पुगेर देशमा सबै तहका सबै प्रकारका भ्रष्टाचार तथा अनियमितता अन्त्य गर्न र सुशासनको प्रत्याभूति गर्न गराउन एउटा दरो प्रस्थानविन्दू बनोस् भन्ने कामना गर्दछु ।’