दुर्गन्धित कोक बेच्नेलाई डेढ लाख जरिवाना तिराइयो

१० भदौ, काठमाडौं । बत्तिसपुतलीस्थित कोकाकोला बिक्रेता कालिञ्चोक ट्रेडिङ नेपालले काठमाडौं महानगरपालिकालाई १ लाख ५० हजार रुपैयाँ जरिवाना तिरेको छ । 

ढुसी लागेर पिउन नमल्निे कोकाकोला बिक्री गरेको पुष्टि भएपछि महानगरको बजार अनुगमन समितिलाई उक्त जरिवाना रकम तिरेको हो । कालिञ्चोक ट्रेडिङले शुक्रबार बिक्री गरेको कोकाकोलाको सिलबन्दी सिसाको बोतलमा ढुसी लागेको कोक फेला परेको थियो । आइतबार समितिका निरीक्षण अधिकृत अवधेश झाले जरिवाना तिराएका हुन् । 

उत्पादन गर्दाका बखत नभई बिक्रेताको लापरवाहीबाट अखाद्य अवस्थाको कोक बजारमा पुगेको अनुगमन समितिको निष्कर्ष छ । बोतलको कोक गन्हाइसकिएको अनुगमन टाेलीको दाबी छ ।

कम्पनीलाई दुर्गन्धित कोक फिर्ता लैजान, राम्रोसित सिलबन्दी नभएको बोतल बजारमा वितरण नगर्न लगायत ३ बुँदे निर्देशन समेत दिइएको छ । चाड पर्व नजिकिएसँगै महानगरले बजार अनुगमन तीव्र पार्दै लगेको छ ।