नेपाल एयरलाइन्सले काठमाडौंलाई ट्रान्जिट बनाएर भैरहवाबाट हङकङ र नयाँ दिल्लीमा उडान गर्ने

१० भदौ, काठमाडौं । नेपाल वायुसेवा निगम (नेवानि)ले भैरहवास्थित गौतमबुद्ध अन्तर्राष्ट्रिय विमानस्थलबाट हङकङ र नयाँ दिल्लीमा नियमित उडान भर्ने भएको छ । नेवानिले यही १२ भदौ काठमाडौंलाई ट्रान्जिट बनाएर हङकङ र नयाँ दिल्लीमा नियमित उडान गर्ने जनाएको छ । 

भैरहवाबाट हप्ता एक चोटी मंगलबार काठमाडौं ट्रान्जिट बनाएर हङकङ उडानबाट सुरु गर्ने जनाइएको छ । सोही उडानबाट भैरहवाका यात्रु काठमाडौं ओर्लिएर नयाँ दिल्ली जान सकिने व्यवस्था मिलाइएको निगमले जनाएको छ । 

उडान भैरहवाबाट बिहान ८ः१५ मा उडेर ९ बजे काठमाडौंमा अवतरण गर्ने र तत्पश्चात ट्रान्जिट भइ हङकङ जाने उडानमा र दिल्ली जाने यात्रु निगमकै कनेक्टिङ उडानमा चढ्ने व्यवस्था गरिएको छ ।

यात्रुहरुले निगमको टिकट निगमको कार्यालय वा निगमको वेबसाइटमा लगइन गरी किन्न सकिने जनाइएको छ । निगमले क्वालालाम्पुरलाई भैरहवासँग जोडेर नियमित उडान गरिरहेको छ ।