इन्जिनियरिङ शिक्षाको शुल्क वृद्धिको विरोधमा नेविसंघले डीनको सांकेतिक शवयात्रा निकाल्दै

१२ भदौ, ललितपुरं । त्रिभुवन विश्वविद्यालय अन्तर्गत इन्जिनियरिङ अध्ययन संस्थानले इन्जिनियरिङ शिक्षामा गरेको चर्को शुल्क वृद्धिको विरोधमा कांग्रेस निकट विद्यार्थी संगठन नेविसंघले डीनकार्यालय प्रमुखसहितको सांकेतिक शव यात्रा निकाल्दैछ । 

पुल्चोक इन्जिनियरिङ कलेजबाट मंगलबार बिहान साढे ११ बजे शव यात्रा निकाल्ने तयारी गरेको छ । ‘शव तयार भइसकेको छ, हामी छिट्टै इन्जिनियरिङतर्फका डीन कार्यालयका प्रमुख लगायत प्रमुखहरुको शवयात्रा निकाल्दैछौं’ नेविसंघका एक नेताले बताए । 

शवयात्रा पुल्चोकबाट काठमाडौंको माइतीघर मण्डलामा पुगेर कोणसभामा परिणत हुने उनले बताए । अहिले पुल्चोक क्याम्पसमा सांकेतिक शवयात्राका लागि विद्यार्थीहरु पुगिसकेका छन् । प्रहरीले भने शवयात्रा निकाल्न नदिने माथिबाट आदेश भएको भन्दै निकाल्न नदिने जनाएको छ । अहिले पुल्चोक र पाटन संयुक्त क्याम्पस वरपर बाक्लो संख्यामा सुरक्षाकर्मी परिचालन गरिएको छ ।

संस्थानले इन्जिनियरिङ शिक्षामा साविकको शुल्क १ सय ६५ प्रतिशत बढाएर ७ लाख ८० पुर्याएको छ । जसको विरोधमा सबै विद्यार्थी संगठनहरु उत्रिएका छन् । शुल्क वृद्धि फिर्ताको माग गर्दै ३ विद्यार्थी नेता पुल्चोक क्याम्पसामा ४ दिनदेदि आमरण अनसन बसिरहेका छन् ।