हिमालयले थाल्यो चीनको छिन्ताओ शहरबाट काठमाडौंसँग सिधा उडान

२४ भदौ, काठमाडौं । उत्तरी छिमेकी चीनको छिन्ताओ शहरसँग काठमाडौंको सिधा उडानमा जोडिएको छ । हिमालय एयरलाइन्सले आइतबारदेखि काठमाडौं– छिन्ताओ–काठमाडौं रुटमा सिधा उडान थालेको हो । अब हरेक आइतबार यस रुटमा हिमालयले उडान गर्ने भएको छ । 

त्रिभुवन अन्तर्राष्ट्रिय विमानस्थलबाट स्थानीय समय अनुसार बिहान ९ः१५ मा प्रस्थान गरेको हिमालयको पहिलो जहाज छिन्ताओकोे जियाओडोङ अन्तर्राष्ट्रिय विमानस्थलमा १०० जना यात्रु बोकेर स्थानीय समय अनुसार साँझको ५ः२२ बजे अवतरण गर्ने भएको छ । यो उडानको अवधि ५ घण्टा ५० मिनेटको रहनेछ ।

छिन्ताओ चीनको महत्वपूर्ण व्यापारिक र वित्तीय केन्द्र हो । आज छिन्ताओ उडानको उद्घाटन संस्कृति, पर्यटन तथा नागरिक उड्डयन मन्त्री सुदान किरातीले गरेका छन् । नेपालका लागि चिनियाँ राजदूत छेन सोङ, हिमालय एयरलाइन्स्का अध्यक्ष झोउ एनयोङ र उपाध्यक्ष विजय श्रेष्ठ समेत उपस्थित थिए ।

पछिल्लो समयमा चिनियाँ नागरिक नेपाल भ्रमणमा आउने क्रम बढेको पर्यटन व्यवसायीहरु बताउँछन् । सिधा उडानले पर्यटन विकासमा महत्वपूर्ण सहयोग पुग्ने मन्त्री किरातीले धारणा राखेका थिए ।