आजबाट सरकारी कर्मचारीलाई एक घण्टा राहत

१६ कात्तिक, काठमाडौं । चिसो मौसम सुरु भएसँगै सरकारी कार्यालयहरू आजबाट एक घण्टा चाँडो बन्द गरिने भएका छन् । सरकारी कर्मचारीले एक घण्टा अगाडि कार्यालयबाट निस्कने पाउने भएका हुन् । 

सरकारी कार्यालयहरू आजबाट अपरान्ह ४ बजेसम्म मात्रै खुल्ने छन् । सरकारले कात्तिक १६ देखि माघ १५ गतेसम्म सरकारी कार्यालयहरू बिहान १० देखि अपरान्ह ४ बजेसम्म मात्रै सञ्चालनको समय तय गरेको हो ।

चिसो र दिन छोटो हुने भएकाले हरेक वर्ष यी ३ महिना सरकारी कार्यालय समय ६ घण्टा मात्रै तय हुने गरेको छ । एक घण्टा अगाडि सरकारी कार्यालयहरू बन्द हुने भएपछि साँझ हुने सडक जाम केही कम हुने अनुमान गरिएको छ ।