सत्ता गठबन्धनमा संकट : बालकोटमा नयाँ ड्राफट, बालुवाटारमा रुजु

२० फागुन, काठमाडौं । एक वर्ष अघि रामचन्द्र पौडेललाई राष्ट्रपति बनाउने गरी बनेको कांग्रेस –माओवादीसहितको सत्ता गठबन्धनमा धरापमा परेको छ । सरकार सञ्चालनमा अविश्वास चलिरहेको बेला बालुवाटारमा प्रधानमन्त्री पुष्पकमल दाहाल, विपक्षी दलका नेता केपी शर्मा ओलीबीच भएको भेटघाटले अन्ततः गठबन्धनलाई धरापमा पारेको हो ।

त्यसपछि २०७९ पुस १० गते केही दिनका निम्ति बनेर टुटेको गठबन्धनका प्रमुख पात्रहरुबीच ३ घण्टासम्म सघन छलफल भएको थियो । जसमा रास्वपाका रवि लामिछाने,एमाले अध्यक्ष केपी ओली,महासचिव शंकर पोख्रेल,माओवादी उपमहासचिव वर्षमान पुन,उपाध्यक्ष नारायणकाजी  श्रेष्ठ र जसपा अध्यक्ष उपेन्द्र यादव सहभागी भएको बालुवाटार उच्च स्रोतले जनाएको छ ।

यसअघि आजै दिउँसो डेढ बजे बालुवाटारमै भारतीय राजदूत नवीन श्रीवास्तव र प्रधानमन्त्रीबीच भेटवार्ता भएको थियो । विकसित घटनाक्रमअनुसार राष्ट्रिय सभा अध्यक्षमा कांग्रेसले दावी नछाडेमा जुनसुकै अवस्था आउन सक्ने आँकलन गरिएको अवस्थामा माओवादीले कांगेसलाई देखाउने गरी सत्ताको काँध फेर्ने कोसिसमा लागेको स्रोतको दावी छ ।

बालुवाटार बैठक सकिएपछि एमाले नेताहरु आइतबार राती अबेर बालकोटमा भेला भएका थिए । वरिष्ठ उपाध्यक्ष ईश्वर पोखरेलसहित भेला भएका नेताहरूबीच सत्ता गठबन्धनमा देखिएको समस्या र टीआरसी विधेयकबारे छलफल गरेको थियो । समयमा आइतबार नेकपा एमाले र राष्ट्रिय स्वतन्त्र पार्टीका शीर्ष नेता बालुवाटार पुगेर प्रधानमन्त्री पुष्पकमल दाहाल ‘प्रचण्ड’सँग छलफल गरे लगत्तै उनीहरू बालकोटमा पुगेका हुन् ।

सत्ता गठबन्धनभित्र खटपट चलिरहेको समयमा आइतबार नेकपा एमाले र राष्ट्रिय स्वतन्त्र पार्टीका शीर्ष नेता बालुवाटार पुगेर प्रधानमन्त्री पुष्पकमल दाहाल ‘प्रचण्ड’सँग छलफल गरेपछि यसलाई कांग्रेसले निकै महत्वका साथ हेरेको छ ।

राष्ट्रिय सभा अध्यक्ष पदका लागि उम्मेदवारीबारे सत्ता पक्षका मुख्य दुई घटक नेपाली कांग्रेस र माओवादी केन्द्रबीच हानथाप चलिरहेका बेला विपक्षी दुई दलका शीर्ष नेताहरूसँग प्रधानमन्त्रीको छलफललाई निकै चासोका साथ हेरिएको हो । साथै एमाले नेताहरूको बालकोट बैठक र माओवादी नेताहरूको बालुवाटार बैठकलाई महत्वको साथ हेरिएको छ । जानकारहरूका अनुसार माओवादीले एमालेको साथ खोजेपछि नयाँ गठबन्धनको कसरत शुरु भएको छ ।