प्रधानमन्त्री प्रचण्डविरुद्धको रिट न्यायाधीश रेग्मी र शर्माको इजलाशमा

२७ फागुन, काठमाडौं । प्रधानमन्त्री पुष्पकमल दाहाल प्रचण्डविरूद्ध  सर्वोच्च अदालतमा परेको  रिटमाथि आज सुनुवाइ हुँदैछ । अधिवक्ता ज्ञानेन्द्रराज आरण र कल्याण बुढाथोकीले  प्रचण्डविरुद्ध दायर गरेको रिटमा आइतबार पेशी तोकिएको हो । 

न्यायाधीशद्धय कुमार रेग्मी र विनोद शर्माकोमा इजलाशमा पेशी तोकिएको छ । यो दोस्रो सुनुवाइ हो । यसअघि न्यायाधीश न्यायाधीश ईश्वर खतिवडाको इजलासले अन्तरिम आदेशको छलफलमा बोलाएको थियो । २०७९ फागुन २६ गते अग्राधिकार र कारण देखाउ आदेश जारी गरेको थियो । 

अधिवक्ता आरण र बुढाथोकीले द्वन्द्वकालीन मुद्दालाई लिएर प्रचण्डविरूद्ध फौजदारी अभियोगमा छानबिन र कारवाही हुनुपर्ने आदेश माग गर्दै सर्वोच्चमा रिट दिएका थिए ।  २०७६ माघ १ गते  माघीका अवसरमा टुँडिखेलमा आयोजित कार्यक्रममा प्रचण्डले द्वन्द्वकालमा भएका मानिसहरूको हत्यामध्ये पाँच हजारको जिम्मा आफूले लिने बताएका थिए । उक्त विषयमा प्रधानमन्त्री प्रचण्डलाई पक्राउ गरी आवश्यक कारबाही गर्न आदेश माग गर्दै उनीहरूले रिट दर्ता गराएका थिए । 

शुरुमा उक्त रिट दर्ता नगर्दै सर्वोच्च प्रशासनले दरपीठ गरेको थियो । दरपीठ विरुद्ध उनीहरुले इजलासमा निवेदन दिएका थिए । उक्त निवेदनमा न्यायाधीश ईश्वरप्रसाद खतिवडा र हरिप्रसाद फुयालको इजलासले प्रचण्ड विरूद्ध उनीहरूले दिएका रिट दर्ता गर्न आदेश गरेको थियो ।  

सर्वोच्च प्रशासनले उक्त रिट दरपीठ गरेपछि त्यसविरूद्ध निवेदन दिएका थिए । सोही निवेदनमा उक्त इजलासले सुनुवाई गर्दै दरपीठ गर्ने निर्णय बदर गरी रिट दर्ता गर्न भनेको थियो ।   त्यसपछि आरण र बुढाथोकीको  रिट दर्ता  भएर सुनुवाइमा गएको थियो ।