देशभरबाट आएका सहकारी पीडितहरुको आज काठमाडौंमा प्रदर्शन

१ चैत, काठमाडौं । सहकारी पीडितहरुले आज काठमाडौं उपत्यकामा प्रदर्शन गर्दैछन् । उनीहरुले काठमाडौंका विभिन्न स्थानबाट जुलुस निकालेर भृकुटी मण्डपमा एकीकृत सभा गर्ने जानकारी दिएका छन् । सरकारी पीडितहरुले काठमाडौं उपत्यकाको सवारी आवागमन अवरुद्ध हुनसक्ने जानकारी पहिले नै गराएको बताएका छन् । 

काठमाडौंमा भेला भएका सहकारी पीडितले आज प्रदर्शन गर्ने भएका हुन् । उनीहरू देशका विभिन्न स्थानबाट राजधानीमा भेला भएका थिए । पीडितहरुले विभिन्न पाँच केन्द्रविन्दुबाट प्रदर्शन गर्दै भृकुटीमण्डपमा जम्मा भएर सभा गर्ने कार्यक्रम तय भएको जानकारी दिएका छन् । 

प्रदर्शन गर्नका लागि कालिमाटी, गोंगवु नयाँ बसपार्क नजिकको बिजी मल, शंखपार्क, सिफल चौर र जावलाखेल केन्द्रविन्दु तोकिएको छ । ती पाँच स्थानबाट बिहान ११ बजे पैदल मार्च सुरु गर्दै पीडितहरु सुन्धारामा भेला हुने छन् । सबै टोली सुन्धारामा भेला भएर भृकुटीमण्डप पुग्ने र कोणसभा गर्ने कार्यक्रम तय भएको छ ।

सहकारी पीडितहरुको प्रदर्शनको नेतृत्व सहकारी बचतकर्ता संरक्षण राष्ट्रिय अभियान (महासंघ)ले गरेको छ । महासंघका अध्यक्ष कुशल केसीले आफूहरूले सरकार समक्ष राखेका माग आज सम्बोधन नभए सबै पीडितहरु सहकारी विभागमा गएर बस्ने चेतावनी दिए ।