सिन्धुलीको बीपी पार्कभित्र रहेको टेलिकमको टावरमा कुकर बम विस्फोट

२ चैत, काठमाडौं । सिन्धुलीको सुनकोशी गाउँपालिका–१ दुम्जा डाँडास्थित नेपाल टेलिकमको टावर परिसरमा कुकर बम विस्फोट भएको छ । आज बिहान ३ बजे दुम्जा डाँडास्थित विपी पार्कमा रहेको नेपाल टेलिकमको टावरको कम्पाउन्ड भित्र कुकर बम विस्फोट भएको हो ।

जिल्ला प्रहरी कार्यालय सिन्धुलीका सूचना अधिकारी डिएसपी चिरञ्जिवी दाहालका अनुसार विस्फोटको सूचना पाउनासाथ प्रहरी टोली घटनास्थल पुगेको थियो । टावरको कम्पाउन्डभित्र रहेको पक्की घरको झ्यालमा अपरिचित समूहले कुकर बम पड्काएको भेटिएको हो । 

प्रहरीले कुकरको बिर्को झ्यालमा अड्किएको र कुकरको भाग भुइँमा रहेको अवस्थामा फेला पारेको छ । त्यस्तै पेट्रोलको गन्ध आउने बोतल र जन मुक्ति सेना लेखिएको पर्चा पनि बरामद भएको डिएसपी दाहालले जानकारी दिए ।

विस्फोटबाट टावर परिसरमा रहेको भवनको झ्यालमा सामान्य क्षति भएको तर टेलिकमको टावरमा भने क्षति नभएको बताइएको छ । बम विस्फोटको सूचना पाउनासाथ प्रहरी चौकी कुशेश्वर दुम्जाबाट टोली खटिएको थियो । घटनाको थप अनुसन्धान भइरहेको र विस्फोट गराउने काममा संलग्नहरुको खोजी जारी रहेको प्रहरीले जनाएको छ ।