सुरक्षाबाहेक सरकारले उपनिर्वाचनका लागि आयोगलाई दियो १० करोड

६ चैत, काठमाडौं । उपनिर्वाचनका लागि सरकारले निर्वाचन आयोगलाई १० करोड दिएको छ । आउँदो वैशाख १५ गते हुने उपनिर्वाचनका लागि १० करोड रुपैयाँ उपलब्ध गराएको हो । 

निर्वाचन आयोगले पत्राचार गरे अनुसार १० करोड खर्च गर्न अनुमति दिइएको अर्थ मन्त्रालयले जनाएको छ । मापदण्डअनुसार आयोगलाई १० करोड विनियोजन गरिएको हो । सुरक्षा निकायलाई मन्त्रालयले बजेट दिएको छैन । 

वैशाख १५ गते प्रतिनिधिसभा अन्तर्गत इलाम क्षेत्र नम्बर–२ र प्रदेशसभा अन्तर्गत बझाङ क्षेत्र नम्बर–१ ‘क’मा उपनिर्वाचन हुँदै छ । संविधानसभाका अध्यक्ष एवं नेकपा एमालेका उपाध्यक्ष सुवास नेम्वाङको निधनपछि रिक्त इलाम–२ मा उपनिर्वाचन गर्न लागिएको हो ।

यस्तै, सुदूरपश्चिम प्रदेशका तत्कालीन आन्तरिक मामिला तथा कानुन मन्त्री पृथ्वीबहादुर सिंहको मृत्युपछि बुझाङ–१ ‘क’को प्रदेशसभा पद रिक्त छ । उपनिर्वाचनका निम्ति प्रतिनिधिसभातर्फ २० र प्रदेशसभातर्फ १९ दल दर्ता गरिएको आयोगले जनाएको छ ।