गृहमन्त्री लामिछानेकी पत्नी निकिता पौडेल सम्बद्ध साई स्वागत सहकारीमा महानगरले मार्यो छापा

२१ चैत, काठमाडौं । उपप्रधान तथा गृहमन्त्री रवि लामिछानेकी पत्नी निकिता पौडेल सम्बद्ध रहेको साई स्वागत बचत तथा ऋण सहकारी संस्थामा काठमाडौं महानगरपालिकाले छापा मारेको छ । महानगरपालिकाको सहकारी विभागले बचतकर्ताको उजुरीका आधारमा बुधबार विभागका कर्मचारी, महानगर प्रहरी सहितको टोलीले छापा मारेको हो ।

निकिता यसअघि सो सहकारीकी उपाध्यक्ष थिइन् । उनीविरुद्ध उजुरी पनि परेको थियो । सञ्चालक समितिका तत्कालीन उपाध्यक्ष पौडेल र अर्का एकले ७० लाख रुपैयाँ सहकारीबाट निकालेको बचतकर्ताको आरोप छ । उक्त रकम सहकारीलाई फिर्ता गरिसकेको उनको दावी छ । सहकारीले नयाँ सञ्चालक समिति चयन गरेको भएपनि संस्थाको पूर्वअध्यक्ष भरतजंगम र उपाध्यक्षमा गृहमन्त्री पत्नी निकिता पौडेल छन् । सोही सहकारी दुई वटा समूह छ ।

बिजुलीबजारमा रहेको सहकारी कार्यालयबाट पछिल्लो साधारणसभाको उपस्थिति निर्णय सहित माइन्युट, सहकारीबाट ऋण लिने ऋणीको विवरण, बचतकर्ताको विवरण ल्याएको छ । धेरै ऋण लैजाने ऋणी, सञ्चालक समितिका सदस्यहरूको विवरण पनि टोलीले ल्याएको छ । सहकारीको सफ्टवेयर सिस्टम पनि महानगरको टोलीले बरामद गरेको छ । महानगरपालिका अनुसार धेरै उजुरी आएका ४० सहकारीमध्ये साई स्वागत बचत तथा ऋण सहकारी पनि एक हो ।

महानगर सहकारी विभागमा उपाध्यक्ष पौडेल जमानी बसेर ऋण दिएको मान्छे नै भागेको उजुरी परेको थियो । विभागका अनुसार बचतकर्ताले सञ्चालक समितिबाट रकम हिनामिना गरेको भन्दै बचत फिर्ता दिन महानगरमा उजुरी दिएका थिए । महानगरले ४० वटा सहकारीमध्ये साई स्वागत बचत तथा ऋण सहकारी पनि एक हो । गृहमन्त्री लामिछानेविरुद्ध पनि सहकारी ठगीको विषयमा छानविन भइरहेको छ ।