लुम्बिनी र सुदूरपश्चिमका मुख्यमन्त्रीले दिए राजीनामा

२२ चैत्र, काठमाडौं । लुम्बिनी र सुदूरपश्चिमका मुख्यमन्त्रीले राजीनामा दिएका छन् । दुबै नेपाली कांग्रेसबाट मुख्यमन्त्री बनेको थिए । सुदूरपश्चिमका मुख्यमन्त्री कमलबहादुर शाहले बहुमत पुर्याएर विश्वासको मत लिने कसरत गरेका थिए । तर, बहुमत नपुग्ने भएपछि प्रदेश प्रमुख नजिर मियाँ समक्ष बिहीबार साँझ राजीनामा दिएका हुन् । 

त्यसअघि उनले विश्वासको मत लिनका लागि प्रदेश सभामा मत परीक्षण गर्ने तयारी गरेका थिए । त्यसै अनुसार दिउसो साढे तीन बजेका लागि आव्ह्रान गरिएको बैठक दुई पटक सारिएको थियो । अन्तिम समयमा नागरिक उन्मुक्ति पार्टीका सबै सांसदको साथ पाउने अपेक्षा मुख्यमन्त्री शाहको थियो । तर सो पार्टीका अध्यक्ष रञ्जिता श्रेष्ठ चौधरी पक्षधर सांसद कैलाश चौधरी र टीका थापा काठमाण्डौंबाट नआएपछि उनले राजीनामा दिएका हुन् । 

यस्तै लुम्बिनी प्रदेशका मुख्यमन्त्री डिल्लीबहादुर चौधरीले पनि आजै पदबाट राजीनामा दिएका छन् । बहुमत जुटाउन असफल भएपछि प्रदेश सभा बैठकमा सम्बोधन गर्दै उनले राजीनामा घोषणा गरेका हुन् । राजीनामा घोषणा गर्दै उनले प्रदेशको विकास र समृद्धिका लागि अब बन्ने सरकारलाई गुण र दोषका आधारमा समर्थन र आलोचना गर्ने बताए ।

चौधरीको राजीनामासँगै नयाँ सरकार गठनको बाटो खुलेको छ । गठबन्धनको भागबन्डामा लुम्बिनी सरकारको नेतृत्व पाएको माओवादीले नयाँ सरकार बनाउन दलहरूसँग छलफलमा जुटेको छ । चौधरी गत वर्ष वैशाख १४ गते आठ राजनीतिक दल र एक स्वतन्त्र गरी ५३ जना सांसदको समर्थनमा मुख्यमन्त्रीमा नियुक्त भएका थिए ।

एक महिना अघि केन्द्रमा फेरिएको सत्ता गठबन्धनसँगै नेकपा माओवादी केन्द्रले २३ फागुनमा समर्थन फिर्ता लिएपछि चौधरी अल्पमतमा परेका थिए । यस बीचमा बहुमत जुटाउने प्रयास गर्दै उनले बिहीबार विश्वासको मत लिने प्रयोजनका लागि प्रदेश सभा बैठक आह्वान गरेका थिए ।