मनाङेले गण्डकीमा पाँचौ पटक मन्त्री बनेर रेकर्ड बनाए

२५ चैत, पोखरा । गण्डकी प्रदेशमा एकीकृत समाजवादी त्यागेर स्वतन्त्र हैसियत बनाएका राजीव गुरुङ (दीपक मनाङे)ले मन्त्रीमा रेकर्ड  बनाएका छन् । उनी सहितको समर्थनमा मुख्यमन्त्रीमा नियुक्त भएका अधिकारीले आजै मनाङेलाई मन्त्री  बनाएका हुन् । यो पटक समेत गरी मनाङे पाँचौ पटक मन्त्री भएका छन् । संविधानको धारा १६८ (२) बमोजिम दुई वा दुईभन्दा धेरै दलको समर्थनमा मुख्यमन्त्री नियुक्त भएका अधिकारीले ३ सदस्यीय मन्त्रिपरिषद गठन गरेका छन् ।  

अधिकारीले माओवादीबाट १ जना र दीपक मनाङेलाई मन्त्री बनाएका हुन् । मुख्यमन्त्रीको शपथसँगै अन्य २ जनालाई विना विभागीय मन्त्री नियुक्त गरेको एमाले संसदीय दलका प्रमुख सचेतक गोविन्द नेपालीले जानकारी दिए । माओवादीले नाम टुंगो लगाउन छलफल गरिरहेको छ । 

मनाङेले महिना दिनमै दोस्रो पटक मन्त्रीको शपथ खाएका छन् । एमाले–माओवादीको बहुमत पुग्न नदिने रणनीतिका साथ एकीकृत समाजवादीबाट स्वतन्त्र भएका मनाङेलाई यही चैत ५ गते निवर्तमान  मुख्यमन्त्री सुरेन्द्रराज पाण्डेले भौतिक पूर्वाधार मन्त्री बनाएका थिए ।

दोस्रो कार्यकालका लागि मनाङबाट स्वतन्त्र चुनाव जितेका मनाङे गण्डकीमा पाँचौ पटक मन्त्री हुँदैछन् । प्रदेशमा सत्ताको जोडघटाउमा चतुर देखिएका मनाङे अघिल्लो कार्यकालमा ३ पटक खेलकुद मन्त्री बनेका थिए भने अहिले दोस्रो पटक मन्त्री हुन लागेका हुन् ।