गण्डकी सरकारविरुद्ध कांग्रेसको रिटमा आज सुनुवाइ

२८ चैत, काठमाडौं । नेपाली कांग्रेसले सर्वोच्च अदालतमा गण्डकी प्रदेश सरकार विरुद्ध दिएको रिटको पेसीमा आज सुनुवाइ हुँदैछ । गण्डकी प्रदेशका निवर्तमान मुख्यमन्त्री एवं नेपाली कांग्रेस संसदीय दलका नेता सुरेन्द्रराज पाण्डेले दायर गरेको रिटमा सर्वोच्चले आजलाई पेसी तोकिएको छ । 

आज प्रारम्भिक सुनुवाइपछि अन्तरिम आदेश भएमा मुख्यमन्त्री खगराज अधिकारी नेतृत्वको गण्डकी सरकार ढल्नेछ । अन्तरिम आदेश नभएमा भने अन्तिम आदेश नहुँदासम्म गण्डकीमा नेकपा एमाले संसदीय दलका नेता अधिकारी नेतृत्वको सरकार कायम रहनेछ । 

सभामुखसहितको हस्ताक्षरमा बहुमत देखाएर अधिकारी सोमबार मुख्यमन्त्रीमा नियुक्त भएपछि कांग्रेसले विरोध गर्दै आएको छ । गण्डकी प्रदेशका सभामुखको हस्ताक्षरसहितको दाबी सदर नगर्न भन्दै कांग्रेसले  प्रदेश प्रमुखको ध्यानाकर्षण समेत गराएको थियो । अधिकारी मुख्यमन्त्री नियुक्त भएपछि कांग्रेस सरकार गठनविरुद्ध रिट लिएर अदालत गएको हो ।