५ करोड बढी भ्रष्टाचार गरेको ठहर गर्दै सर्लाहीको बागमतीका मेयर थापाविरुद्ध मुद्दा दर्ता

२८ चैत, काठमाडौं । अख्तियार दुरुपयोग अनुसन्धान आयोगले ५ करोड भन्दा बढी रकम भ्रष्टाचार गरेको भन्दै सर्लाहीको बागमती नगरपालिकाका मेयर भरतकुमार थापाविरुद्ध विशेष अदालतमा मुद्दा दर्ता गराएको छ । अख्तियारले ५ करोड ३३ लाख रुपैयाँ अवैधानिक तरिकाले कमाएको दाबी गरेको छ । 

अख्तियारले थापालाई भ्रष्टाचार रकम बराबर बिगो कायम गरी जरिवाना, सजाय तथा सम्पत्ति असुलउपर गर्न माग गरेको छ । थापाले सार्वजनिक सेवामा बहाल रहँदा अवैध तरिकाले कमाएको सम्पत्ति श्रीमती रेश्मीकुमारी घिमिरे, भाइ राम थापा र बुहारी द्वारिका राउतको नाममा समेत राखेको अख्तियारको भनाइ छ । उनीहरुको सम्पत्ति जफतका लागि प्रतिवादी बनाइएको छ ।

अख्तियारका अनुसार थापाले २०७४ असोजदेखि २०७९ माघसम्मको अवधिमा ७ करोड ८६ लाख ५० हजार वैध तरिकाले कुल आम्दानी गरेको र यही अवधिमा १३ करोड २० रुपैयाँ लगानी तथा खर्च गरेको पाइएको छ । यसरी कुल आय तथा लगानी र खर्चको हिसाबमा ५ करोड ३३ लाख ५३ हजार रुपैयाँ अवैध तरिकाले आम्दानी गरेको भेटिएको छ ।