माधव आचार्यले आजदेखि सम्हाले गरिमा विकास बैंकको सीईओको जिम्मेवारी

२ वैशाख, काठमाडौं । गरिमा विकास बैंकको प्रमुख कार्यकारी अधिकृत पदमा माधव प्रसाद उपाध्याय आचार्यले आजदेखि गरिमा विकास बैंकको सीईओको जिम्मेवारी सम्हालेका छन् । सञ्चालक समितिको ३०४ औं बैठकले उनलाई प्रमुख कार्यकारी अधिकृत (सीईओ)मा नियुक्त गर्ने निर्णय गरेको थियाे ।

व्यवस्थापनमा स्नातकोत्तर गरेका उपाध्याय गरिमा विकास बैंक लिमिटेडमा संस्थापना कालदेखि कार्यरत रहनुका साथै विगत १५ वर्षदेखि कम्पनी सचिवको रुपमा र विगत ११ वर्षदेखि नायब प्रमुख कार्यकारी अधिकृत पदमा कार्यरत थिए । उनी बैंकिङ क्षेत्रमा प्रवेश गर्नु पूर्व करिब डेढ दशक अध्यापन प्राध्यापन पेशामा संलग्न थिए । 

बैंकमा विगत १५ वर्षदेखि प्रमुख कार्यकारी अधिकृतको जिम्मेवारी सम्हाल्दै आएका गोविन्द प्रसाद ढकालको कार्यकाल चैत मसान्तमा समाप्त भएपछि नयाँ नियुक्त गरिएको हो । साेही बैठकले ढकालको बिदाइ गरेकाे छ ।

साथै, सोही बैठकले सहायक प्रमुख कार्यकारी अधिकृत अनिल रेग्मीलाई चैत्र १५ गतेदेखि लागू हुने गरी विकास बैंकको कम्पनी सचिवमा नियुक्त गर्ने निर्णय समेत गरेको छ ।

लाजिम्पाटमा केन्द्रीय कार्यालय रहेको बैंकले काठमाडौं उपत्यकाभित्र २२ सहित देशभर १२३ शाखा कार्यालय, १ एक्सटेन्सन काउण्टर र ५१ वटा एटिएममार्फत् ग्राहकहरूलाई सेवा प्रदान गर्दै आइरहेको छ।