सडकमा भेट्टाएको नागरिकताबाट ६० लाख ठगी, १६ वटा बैंकमा खाता

२ वैशाख, काठमाडौं । काठमाडौं उपत्यका अपराध अनुसन्धान कार्यालयले ठगी आरोपमा समातिएका तीन जनालाई आइतबार सार्वजनिक गरेको छ । उनीहरूले अरूको नागरिकता दुरुपयोग गरी ठगी गरेको आरोपमा पक्राउ परेका हुन । भारतीय आधार कार्ड समेत लिएका उनीहरुले हालसम्म ६० लाख ५५ हजार ठगी गरिसकेको प्रहरीको भनाइ छ । 

पक्राउ पर्नेहरूमा श्रीमान–श्रीमतीसहित तीन जना छन् । ठगी आरोपमा सन्जुसँगै उनका श्रीमान पनि पक्राउ परेका छन् । श्रीमान निश्चलले पनि भारतीय आधार कार्ड समेत लिएको खुलेको छ । झापाको अर्जुनधारा–९ कि ३८ वर्षीया रश्मी विश्वकर्मा भनिने सन्जु पौडेली, उनका श्रीमान ३५ वर्षीय ३५ वर्षीय निश्चल पोर्तेल र इलामका ३४ वर्षीय धनबहादुर विकलाई प्रहरीले सार्वजनिक गरेको हो । 

 प्रहरीका अनुसार सन्जु पौडेलीले रश्मी विश्वकर्माको नागरिकता भेट्टाएकी थिइन् । उक्त नागरिकताको फोटो उप्काएर सन्जुले आफ्नो फोटो टाँसी सोही नागरिकताको आधारमा उनले विभिन्न बैंकहरुमा १६ वटा खाता खोलेको भेटियो । त्यसपछि ह्वाट्स एपमार्फत विभिन्न व्यक्तिहरूसँग सम्पर्क गरी काउन्सिलिङ गर्दै पार्सल पठाएको, चिट्ठा परेको, डलर पठाएको जस्ता प्रलोभन पारी ठगी गर्दै आएको पाइयो । 

अपराध अनुसन्धान कार्यालयका प्रवक्ता रवीन्द्र रेग्मीले सन्जुले यो शैलीमा विगत दुई वर्षदेखि ठगी गर्दै आएको खुलेको बताए । सन्जुले पीडितहरूले भने आफू त्रिभुवन अन्तराष्ट्रिय विमानस्थलको कुरियर सिनियर अधिकृत रहेको भन्दै परिचय दिने गरेकी थिइन् । सन्जुले रश्मीको मात्रै नभएर अरूको समेत नागरिकता दुरुपयोग गरी ठगी गरेको खुलेको प्रहरीले जनाएको छ ।

उनीहरूबाट विभिन्न व्यक्तिका ६ थान नागरिकता, एनसेलका २६ थान सीम कार्ड, भारतीय सीम कार्ड १ थान, विभिन्न बैंकको ८ थान एटीएम, चेकबुक ११ थान, बैंक तथा सहकारीमा डिपोजिट गरेको १८ थान स्लीप, ६ थान मोबाइल बरामद गरेको छ । पक्राउ परेका तीनै जनालाई कारबाहीका लागि जिल्ला प्रहरी परिसर काठमाडौं पठाइएको छ ।