निर्माण व्यवसायी संघको अध्यक्षमा भीष्म अधिकारीको दावेदारी

४ वैशाख, काठमाडौं ।  निर्माण व्यवसायी संघ चितवनको अध्यक्षमा भीष्म अधिकारीले उम्मेदवारी दिने भएका छन् । यही वैशाख २० गतेदेखि चितवनमा हुन गइरहेको २९ औं साधारणसभा तथा अधिवेशनमा उनले अध्यक्ष पदमा उम्मेदवार बन्ने तयारी थालेका हुन् ।

चितवनमा अब्बल र इमान्दार निर्माण व्यवसायीको परिचय बनाएका भीष्म युवा अवस्थामा नै निर्माण क्षेत्रमा लागेका थिए । उनको निर्माण कम्पनीले उत्कृष्ट कार्य गर्दै आएपछि उनले निर्माण क्षेत्रमा प्रशंसा बटुलेका थिए । निर्माण क्षेत्रमा सरकारले तोकेको नियम, परिधि र समयसीमा भित्रमा निकै उत्कृष्ट काम गरेपछि उनी यसअघि २६ औं अधिवेशनमा महासचिवमा निर्वाचित भएका थिए । उनले आफ्नो महासचिव कार्यकालमा विभिन्न गुट हटाउने भुमिका, निर्माण व्यवसायीको हित, विकास निर्माणलाई गतिशील बनाउने काममा निकै महत्वपूर्ण काम गरेका थिए । 

उनले महासचिवको पदमा रहँदा देशभरका निर्माण व्यवसायी भेला गरेर विकास निर्माणमा चुस्तदुरुस्तता र निर्माण व्यवसायीका समस्याहरूलाई राज्यका नीतिगत तहमा पुर्याउन विशेष भुमिका खेलेका थिए । यसका लागि उनैको समन्वयमा तत्कालीन कार्यसमितिले पूर्वप्रधानमन्त्रीदेखि वर्तमान प्रधानमन्त्रीहरू बोलाएर निर्माण व्यवसायी क्षेत्रका समस्या अवगत गराउन महत्वपूर्ण कामहरू सम्पन्न गरेका थिए ।

भीष्म चितवनका एक युवा निर्माण व्यवसायी हुन् । युवा अवस्थामै विकासको काममा हाम फालेका उनको कम्पनीले साना ठूला निर्माणको काममा उदाहरणीय काम गरिसकेको छ । उनले अब अध्यक्षमा दावेदारी पेश गर्दै गर्दा यो क्षेत्रको सुधारका विषय पनि सार्वजनिक गरेका छन् । निर्माण व्यवसायी महासंघको आन्दोलनका कारण संशोधन भएको सार्वजनिक खरिद नियमावली कार्यान्वयनमा जोड दिने उनले घोषणा गरेका छन् । यो नियमावलीका कारण सरकारले हरेक निर्माण व्यवसायीको रकम समयमै भुक्तानी गर्नुपर्ने, काममा अवरोध हटाउनुपर्ने र चुस्त नियम कानुन तर्जुमा गर्नुपर्ने विषयहरू समेटिएका छन् । 

यी सम्पूर्ण विषयलाई कार्यान्वयन गर्नका लागि व्यवसायी र सरकारबीच सघन पहल गर्न आफू अध्यक्षको पदमा दावेदारी पेश गर्ने तयारी थालेको उनले बताए । भीष्म भन्छन्,‘सरकारले निर्माण व्यवसायीलाई सहज बनायो भने विकास काम छिटो हुने हो’ । यसका लागि निर्माणको इजाजत दिएर राजस्व तिरेपछि तुरुन्त निर्माणको जिम्मा दिन राज्य उदासीनता बनेको उनले चिन्ता प्रकट गरे ।

यस्तै बिबिध समस्या र समाधानका मुद्दाहरू बोकेर २९ औं साधारणसभामा उनी अध्यक्षको जिम्मेवारी सम्हाल्न मैदानमा उत्रिएका छन् । भीष्म ११ वर्षदेखि निरन्तर निर्माण व्यवसायमा खटिँदै आएका छन् । उनी निर्माण व्यवसायलाई समाजसेवाको रुपमा हेर्छन् । उनी चितवनका विभिन्न आधा दर्जन सामाजिक संघ संस्थाहरूमा पनि आबद्ध छन् ।