प्रहरीले तामेलीमा राख्यो एमाले नेता महेश बस्नेतविरुद्ध परेको बलात्कारको मुद्दा

४ वैशाख, काठमाडौं । एमाले नेता तथा पूर्वमन्त्री महेश बस्नेत विरुद्ध जिल्ला प्रहरी परिसर काठमाडौंमा परेको भ्रूण हत्या, बलात्कार डाँका चोरी मुद्दा तामेलीमा राख्न प्रहरीले राय लेखेको छ । 

नेता बस्नेत विरुद्ध एक महिलाले गरेको भ्रूण हत्या, बलात्कार डाँका चोरीको उजुरी उपर अनुसन्धान गर्दा प्रहरी परिसर काठमाडौंले तत्काल मुद्दा चलाउने कुनै तथ्य प्रमाण नपाएको जनाउँदै हाललाई तामेलीमा राख्ने निर्णय गर्दै जिल्ला सरकारी वकिलको कार्यालय काठमाडौंलाई पत्राचार गरेको प्रहरी स्रोतले बतायो ।

बस्नेतविरुद्ध एमाले कै युवा संघमा आबद्ध एक जना ३१ वर्षिया युवतीले प्रहरीमा जाहेरी दिएकी छन् । बस्नेतविरुद्ध फौजदारी कसुरको जाहेरी दर्ता भएको थियो । उनले हुलाकमार्फत पठाएको जाहेरी मुलुकी अपराध संहिता–२०७४ अनुसार प्रहरीमा दर्ता भएको हो । जाहेरी दर्ता भएसँगै बस्नेतलाई काठमाडौं प्रहरीले सोधपुछ तथा अनुसन्धान गरेको थियो । पीडित युवतीले गत ०८० चैत ७ मा प्रहरीमा जाहेरी दिएकी थिइन । 

बस्नेतले आफूलाई दुई पटक बलात्कार गरेको पीडित युवतीले आरोप लगाएकी थिइन् । पीडितले प्रहरीमा दिएको जाहेरीमा काठमाडौँ महानगरपालिका–१० बबरमहलस्थित सनसाईन अपार्टमेन्ट र भारतको गुडगाउँस्थित तुलसी हेल्थकेयर अस्पतालमा बलात्कार गरेको उल्लेख छ । उनीमाथि २ महिना १५ दिनको गर्भ हत्या गरेको आरोप लगाइएको थियो । औषधी खुवाएर र अप्रेसन गरेर दुई पटक भ्रूण हत्या गरेको पीडितको आरोप दावी थियो ।