फरार रहेका जीवन चलाउनेविरुद्ध डिफ्युजन नोटिस जारी गर्न प्रहरीले गर्यो पत्राचार

६ वैशाख, काठमाडौं । नेपाल प्रहरीले सुन तस्करी सम्बन्धी जाँचबुझ गर्न गठित उच्च स्तरीय आयोगले कारबाहीका लागि सिफारिस गरेका फरार अभियुक्त जीवन चलाउने विरुद्ध डिफ्युजन नोटिस जारी गरेको छ । प्रहरी प्रधान कार्यालय उच्च स्रोतका अनुसार महानिरीक्षकको नेतृत्वमा हुने इन्टरपोलको नेशनल कन्ट्रोल ब्यूरो काठमाडौंले इन्टरपोलको महासचिवालयलाई चलाउने विरुद्ध डिफ्यूजन नोटिस जारी गर्न पत्राचार गरिएको हो । 

समितिले चलाउनेलाई सीआईबीका प्रहरीले समातेर पनि छाडेको भन्दै कारबाही गर्न सिफारिस गरेको लामो समय पछि डिफ्युजन नोटिस जारी भएको हो । आयोगको सिफारिसपछि सीआईबीका तत्कालीन एआईजी किरण बज्राचार्य, एसपी सञ्जयसिंह थापा, डीएसपीद्धय रुगम कुँवर र दुर्गा दाहाललाई सीआईबीबाट प्रहरी हेडक्वार्टर सरुवा गरिएको थियो ।

नेपाल प्रहरीको अनुरोधमा प्रहरीको अन्तर्राष्ट्रिय संगठन इन्टरपोलले चलाउनेविरुद्ध डिफ्युजन नोटिस जारी गरेको हो । सीआईबीले चलाउनेविरुद्ध डिफ्युजन नोटिस जारी भएको र उनी चाँडै पक्राउ पर्ने जनाएको छ । झण्डै ६१ किलोभन्दा बढी सुन तस्करी प्रकरणमा जोडिएका चलाउने अहिले फरार छन् । उनलाई पक्राउ गर्न डिफ्युजन नोटिस जारी गर्न सीआईबीले नै पत्राचार गरेको हो । 

सुन तस्करी प्रकरणमा जोडिएका बेल्जियन नागरिक दावा छिरिङसँग चलाउनेको सम्बन्ध देखिएको थियो । राजश्व अनुसन्धान विभागले ३ साउनमा मोटरसाइकलको ब्रेक प्याडभित्र लुकाएर ल्याएको ठूलो परिमाणको सुन बरामद गरेको थियो । उक्त समयमा बयानका क्रममा चलाउनेले नेपाल प्रहरीका अन्य अधिकारीहरूलाई पनि मुछ्ने काम गरेका थिए । तर, प्रहरीले उनको भनाइ आधारहीन भएको बताउँदै आएको छ ।