सभामुखमा कांग्रेसको पनि दावी, पुष्पा भुषाललाई उम्मेदवार बनाउने

६ माघ, काठमाडौं । सभामुखमा सत्तारुढ दल नेकपाले अग्निप्रसाद सापकोटालाई अघि सारेपछि प्रमुख प्रतिपक्षी दल नेपाली कांग्रेसले त्यसलाई चुनौती दिने भएको छ । हत्या आरोपमा अदालतमा मुद्धा विचाराधीन रहेका व्यक्तिलाई सत्तारुढ दल नेकपाले उमेदवार बनाउनु भनेको कानूनी राज्यको अवधारणाको खिल्ली उडाउनु हो भन्दै कांग्रेसले सापकोटालाई समर्थन गर्न नसक्ने जनाएको छ ।

नेपाली कांग्रेसका प्रवक्ता विश्वप्रकाश शर्माले आज ट्वीट गर्दै नेपाली कांग्रेस विधिको शासनको पक्षधर भएको स्पष्ट गरेका छन् । काभ्रेपाल्चोकका अर्जुन लामाको हत्याको आरोपमा सापकोटा विरुद्ध अहिले पनि सर्वाेच्च अदालतमा मुद्धा विचाराधीन रहेको छ । त्यसैले कांग्रेसले सापकोटालाई सभामुख बनाउन उचित ठान्दैन, उनले भनेका छन् ।

स्रोतका अनुसार, कांग्रेसले नेकपाका उम्मेदवार सापकोटाको विरुद्ध संसदीय दलका उपसचेतक पुष्पा भुषाललाई उम्मेदवार बनाउने अन्तिम तयारी गरेको छ । यद्यपि यसबारे कांग्रेस केन्द्रीय कार्य समितिले निर्णय लिन बाँकी छ, तर भुषाललाई उम्मेदवारका रुपमा अघि बढाउने संभावना रहेको छ ।

उता, सापकोटालाई सभामुखको उमेदवार बनाइएकोमा सत्तारुढ दल भित्रै पनि असन्तुष्टी चुलिएको छ । प्रधानमन्त्री समेत रहेका केपी ओली पक्षीय नेताहरुले सापकोटालाई सभामुख बनाउँदा दलको साखमा गिरावट आउने प्रतिक्रिया दिएका छन् । यद्यपि यसबारे ओलीले सहमति जनाइसकेकाले उनीहरु मनको पीडा लुकाउन बाध्य छन् । तर सापकोटालाई पनि ओलीसँग मिलेर काम गर्न सहज भने हुने अवस्था छैन ।

सभामुख भए लगत्तै अमेरिकी सहयोग मिलेनियम च्यालेञ्ज कर्पाेरेशन एमसीसीलाई पारित गराउने सन्दर्भबाटै सापकोटालाई समस्याले घेर्न सक्छ । यस्तै सभामुखका लागि अन्तिम अवस्थासम्म दावी गरिरहेकी उपसभामुख शिवमाया तुम्बाहाम्फेले अब शुरु हुन लागेको प्रतिनिधिसभामा राजीनामा गर्ने भएकी छन् ।

तर उनी पनि आफूमाथि अन्याय भएको सार्वजनिक गर्दै राजीनामा गर्न बाध्य भएकी छन् । राजीनामा गर्नु अघि उनले संसद् सचिवालयमै पत्रकार सम्मेलनको आयोजना गर्दैछिन् । त्यहाँ पनि उनले आफ्ना कुरा राख्ने बताइएको छ । तुम्बाहाम्फेले राष्ट्रपति विद्यादेवी भण्डारीको समर्थनमा सभामुख पदमा दावी गर्दै आएको धेरैको बुझाई रहेको छ ।

यस्तो अवस्थामा सापकोटालाई राष्ट्रपतिको समेत समर्थन र सहयोग नहुन सक्छ । यसरी अध्यक्ष पुष्पकमल दाहालको जोडबलमा सभामुख भएपनि सापकोटालाई संसद् चलाउन भने सहज नहुन सक्छ ।