युनाईटेड इन्स्योरेन्सका ग्राहक असन्तुष्ट, लगानीकर्तालाई वर्षौंदेखि धोका, कम्पनी डुब्ने बाटाेमा

७ असार, काठमाडाैं । आज भन्दा २६ बर्ष अगाडि नेपाल उद्योग बाणिज्य महासंघका पूर्व अध्यक्ष रविभक्त श्रेष्ठको नेतृत्वमा शुरु भएको निर्जीवन बीमा कम्पनी युनाइटेड इन्स्योरेन्स दिनप्रतिदिन ओरालो लाग्न थालेको छ । संचालकहरू बीच लगातारकाे विवाद तथा संचालक र कर्मचारी बीचको आन्तरिक किचलोको कारण युनाईटेड इन्स्योरेन्सले विगत लामो समयदेखि आक्रामक रुपमा व्यापार विस्तार गर्न सकेको छैन ।

युनाईटेड इन्स्योरेन्स कम्पनीका लगानीकर्ताहरुले वर्षौदेखि लाभांश खान नपाएर जिल्ल भएर बसेका छन् । बीमा समितिले तोकेको चुक्ता पुँजी कायम गर्न कम्पनीले २४० प्रतिशतसम्मकाे हकप्रद शेयरको सहयोग लिन पुगेको थियो । विगतका गल्तीलाई विर्सेर कम्पनी अघि बढ्न सकेको छैन । चालु आर्थिक वर्षको तेश्रो त्रैमासको प्रतिवेदन अनुसार कम्पनीको खुद मुनाफामा ठूलो गिरावट आएको छ । चुक्ता पुँजीमा एकैपटक ठूलो वृद्धि हुँदा र नाफामा आएको गिरावटको कारणले गर्दा युनाईटेड इन्स्योरेन्सको प्रतिशेयर आम्दानी निकै नाजुक अवस्थामा छ । ग्राहकहरु पनि कम्पनीको व्यवहारबाट त्यति खुशी छैनन् । नवीकरण गरिएको बीमा लेख संख्यामा धेरै ठूलाे गिरावट आएको छ ।

कम्पनी संचालक समितिको अध्यक्षमा रविभक्त श्रेष्ठ छन् भने संचालक समितिको सदस्यमा पूजा दाहाल, जीवन भट्टराई, निरज तुलाधर, विल्सनमान रंजित र स्वतन्त्र संचालकमा रविन्द्रराज पन्त छन् । व्यवस्थापन समितिमा कामु प्रमुख कार्यकारी अधिकृतको रुपमा रमेशकुमार भट्टराई छन् भने नायव प्रमुख कार्यकारी अधिकृतमा उपासना पौडेल कार्यरत छन् । कम्पनी स्रोतका अनुसार उच्च तहका कर्मचारी नियुक्तीको बेलामा कम्पनीभित्र निकै ठूलो विवाद हुँदै आएकाे छ भने उच्च तहका कर्मचारीहरु बीच लामाे विवाद र मनमुटावले गर्दा कम्पनीले निर्जीवन बीमा बजारमा राम्रो उपस्थिति जनाउन नसकेको प्रस्ट बुझ्न सकिन्छ ।

चालु आर्थिक वर्ष (७६/ ७७) को तेश्रो त्रैमास र अघिल्लो आर्थिक वर्ष (७५/७६ )को तेश्रो त्रैमासलाई दाँजेर हेर्दा :

खुद मुनाफामा पहिरो :
चालु आर्थिक वर्षको तेश्रो त्रैमास र अघिल्लो आर्थिक वर्षको तेश्रो त्रैमासलाई दाँजेर हेर्दा युनाईटेड इन्स्योरेन्सको खुद मुनाफामा ४४ प्रतिशतको गिरावट आएको छ । खुद मुनाफा ४४ प्रतिशतले घट्दै ४ करोड २६ लाखमा सिमित हुन पुगेको छ । जबकी अघिल्लो आर्थिक वर्षको तेश्रो त्रैमासमा कम्पनीले ७ करोड ५५ लाख खुद मुनाफा कमाएको थियो ।

प्रतिशेयर आम्दानी देख्नेलाई नै लाज :
पुँजी पुगाउन २४० प्रतिशत हकप्रद शेयरको साहारा लिएको कम्पनीको खुद मुनाफामा पहिरो आउँदा प्रतिशेयर आम्दानी ५ रुपैयाँ ५३ पैसा मात्र छ ।

२४० प्रतिशत हकप्रद शेयरको भारी बोकाएर १ अर्ब पुँजी :
विगत लामो समयदेखि लाभांश बाढ्न नसक्दा कम्पनीले २४० प्रतिशत हकप्रद शेयरको सहारा लिँदै १ अर्ब पुँजी पुर्रयाएकाे छ । त्यस्तै समिक्षा अवधिमा जगेडा कोष ४० प्रतिशतले वृद्धि हुँदै ११ करोड ४४ लाख पुगेको छ भने बीमा कोष २ प्रतिशतले वृद्धि भएर ३४ करोड ७४ लाख पुगेको छ तर महाविपत्ति जगेडा कोष भने ४३ प्रतिशतले कम हुँदै ६९ लाख १४ हजारमा झरेकाे छ ।

कुल बीमा शुल्क राम्रो वृद्धि भएपनि खुद बीमा शुल्क आर्जनमा लाग्यो ब्रेक
कुल बीमा शुल्क आर्जन रकम ५१ करोड २१ लाख पुगेको छ । सो रकम गत आर्थिक वर्षको तेश्रो त्रैमासमा ३५ करोड ५५ लाख थियो । कुल बीमा शुल्क आर्जन रकममा ४४ प्रतिशतले वृद्धि भएपनि खुद बीमा शुल्क आर्जन रकम भने जम्मा ४ प्रतिशतले मात्र वृद्धि भएको छ । खुद बीमा शुल्क आर्जन २४ करोड ७१ लाख मात्र छ ।

बीमा लेख संख्या वृद्धि भएपनि ग्राहकले विश्वास गर्न छाडे :
बीमा लेख संख्यामा ४० प्रतिशतको वृद्धि भएको अवस्थामा नवीकरण गरिएका बीमा लेख संख्यामा भने २७ प्रतिशतको गिरावट आएको छ । गत आर्थिक वर्षको तेश्रो त्रैमाससम्म ६ हजार १ सय ६२ बीमा लेख नवीकरण भएकोमा यो वर्षको तेश्रो त्रैमाससम्म ४ हजार ५ सय १० मात्र बीमालेख नवीकरण भएका छन् । कम्पनीका ग्राहकहरु सन्तुस्ट नभएको माथिको तथ्यांकले प्रस्ट देखिन्छ ।

भुक्तानी गर्नुपर्ने दावी आकाश चुम्दै :
भुक्तानी हुन् बाँकी दावी रकम ७३ प्रतिशतले वृद्धि भएको छ । गत आर्थिक वर्षको तेश्रो त्रैमासमा २४ करोड ६३ लाख दावी भुक्तानी हुन बाँकी थियो भने अहिले भुक्तानी हुन बाँकी दावी रकम ४२ करोड ५९ लाख रुपैयाँ छ । यसबाट पनि यो बीमा कम्पनीमा दावी भुक्तानी लिन निकै पापड बेल्नु पर्ने पीडितहरुले बताएका छन् । भविश्यको जोखिम बहन गरि सुरक्षित भविश्य राख्ने सपना बुनेर यहाँ बीमा गर्ने बीमितहरु दावी भुक्तानीमा बर्षै झुलिरहनु पर्दा बैंकको ब्याज र पेनाल्टी बढेर घरको न घाटको अवस्थामा पुगेको बताउँछन् ।

ग्राहकले यसरी पाउँदै छन् धोका :
कम्पनी दावी भुक्तानीको मामलामा निकै सुस्त देखिएको छ । कुल दावी भुक्तानी रकम ३० प्रतिशतले कमी आउँदै १६ करोड ५४ लाख पुग्दा खुद दावी भुक्तानी २९ प्रतिशतले कम हुँदै १० करोड ३४ लाख छ।

आम्दानीको तुलनामा बजार मूल्य निकै धेरै :
वार्षिक प्रतिशेयर आम्दानीको तुलनामा बजार मूल्य ५४ गुणा धेरै छ । यो निकै धेरै हो ।

निस्कर्ष :
कम्पनी आम्दानीको मामलामा निकै कमजोर देखिएको छ । तथ्यांक गर्दा ग्राहकलाई कम्पनीले असुन्तस्ट बनाएको प्रस्ट देखिन्छ।  बीमा नवीकरण गर्ने संख्या दिन प्रति दिन घट्दै छ । भुक्तानीमा ढिला सुस्ती र भुक्तानी हुन् बाँकी दावी दिन प्रतिदिन वृद्धि हुनुले ग्राहकले विकल्प खोज्दै जानेकुरा प्रस्ट देखिन्छ ।