फातीले गोल गर्दा बार्सिलोनाको दोस्रो जित

१६ असोज, एजेन्सी । बार्सिलोनाले स्पेनिस ला लिगा फुटबलमा दोस्रो जित हात पारेको छ । बिहिबार राति बार्सिलोनाले सेल्टा डी भिगोलाई ३–० गोल अन्तरले पराजित गरेको हो ।

बार्सिलोनाका लागि फातीले शुरुवाती गोल गरे भने रोबर्टोले अर्को गोल गरे । एक गोल बार्सिलोनाले उपहार पाएको थियो । खेलको ११ औं मिनेटमा फिलिप कौटिन्होको पासलाई सदुपयोग गर्दै फातीले बार्सिलोनालाई अग्रता दिलाएका थिए ।
सेल्टाका लुकास ओलजाको आत्मघाति गोल गर्दा बार्सिलोना २–० ले अगाडी बढ्यो । दोस्रो हाफको इन्जुरी समयमा सेर्गी रोबर्टोले गोल गर्दै बार्सिलोनालाई ३–० को सहज जित दिलाए ।

लिगको पहिलो खेलमा बार्सिलोनाले भिल्लारियललाई ४–० ले हराएको थियो । सो खेलमा फातीले दुई गोल गरेका थिए । बार्सिलोनाले लिगको सुरुवाती २ खेलबाट ६ अंक जोडेको छ । सेल्टा डी भिगोले ४ खेलबाट ५ अंक जोडेको छ ।