डोटीमा छात्रा बलात्कार : काठमाडौंमा गर्भपतन, शिक्षक धरौटीमा रिहा !

२३ डोटी, कार्तिक । डोटीमा छात्रालाई बलात्कार गरेको आरोप लागेका शिक्षक धरौटीमा छुटेका छन् । जिल्लाको केआईसिंह गाउँपालिका–४ की १९ वर्षीया किशोरीलाई बलात्कार आरोप लागेका झिमेमालिका माविका शिक्षक सोफीनाथ भट्टलाई जिल्ला अदालत डोटीले बुधबार ३ लाख धरौटीमा छाड्न आदेश दिएको हो ।

अदालतले अन्याय गरेको भन्दै किशोरीका आफन्तले गुनासो गरेका छन् । बलात्कारबाट गर्भवती भएकी किशोरीले काठमाडौं आएर गर्भपतन गराइसकेकी छन् ।

यस्तै जिल्ला अदालतको फैसला चित्त नबुझेपछि सरकारी वकिलको कार्यालय डोटीले उच्च अदालतमा पुनरावेदन गरेको जनाएको छ ।