दिल्लीमा कोरोना भयावह बन्दै, फेरि थपियो लकडाउन !

१८ बैशाख, एजेन्सी । भारतको राजधानी दिल्लीमा कोरोना महामारी भयावह बन्दै गएपछि दोस्रो पटक लकडाउन थप एक साताका लागि बढाइएको छ । दिल्लीका मुख्यमन्त्री अरविन्द केजरीवालले शनिबार ट्विट गर्दै थप एक साताका लागि लकडाउन बढाइएको जानकारी गराएका हुन् ।

कोरोना संक्रमणको सांग्लो तोड्न भन्दै दिल्ली सरकारले दुई साताअघि एक साताका लागि लकडाउन लागू गरेको थियो । तर, संक्रमणमा अपेक्षाकृत ढंगले कमी नआएपछि ३ मे ९सोमबार० मा दोस्रो चरणको लकडाउन सकिनु दुई दिनअघि नै केजरीवालले शनिबार तेस्रो चरणको लकडाउन गर्ने जनाएका हुन् ।

दिल्लीको अन्य राज्यहरुको तुलनामा संक्रमण दर पनि उच्च रहेको छ । विगत केही दिनयता दिल्लीको संक्रमण दर ३० प्रतिशतभन्दा बढी छ । संक्रमितको संख्यामा केही कमी आए पनि पछिल्ला तथ्याकंले महामारी तत्काल मत्थर हुने संकेत भने गर्दैन । दिल्लीमा शनिबार मात्रै २७ हजार नयाँ संक्रमित थपिएका छन् । र, ३७५ जनाको मृत्यु भएको छ ।

संक्रमण बढेसँगै अस्पतालहरुमा बेड र अक्सिजनको चरम अभाव देखिएको छ । अस्पतालहरुमा अक्सिजन आपूर्ति अवरुद्ध हुँदा कैयनको ज्यान गएको छ । शनिबारमात्र दिल्लीको बत्रा अस्पतालमा अक्सिजन सकिँदा १२ जनाको मृत्यु भएको छ । यसअघि दिल्लीकै दुइटा अस्पतालमा अक्सिजन अभावका कारण ४५ जनाको ज्यान गएको थियो ।