एकीकृत समाजवादी राष्ट्रिय दल नबन्ने पक्का, समानुपातिकतर्फ ४ सिट क्षति व्यहाेर्दै

१९ मंसिर, काठमाडौं । आम निर्वाचन ०७९ मा प्रतिनिधिसभातर्फ समानुपातिकमा माधवकुमार नेपाल नेतृत्वको नेकपा (एकीकृत समाजवादी) राष्ट्रिय दल नबन्ने पक्का भएको छ ।

समानुपातिकतर्फको मतगणना अन्तिम चरणमा आइपुग्दासमेत उसले सदर मतको ३ प्रतिशत मत ल्याउन नसकेपछि राष्ट्रिय दल बन्नबाट चुक्ने भएको छ । कुनैपनि दर राष्ट्रिय स्तरको दल बन्न समानुपातिकतर्फको सदर कूल मतमध्ये ३ प्रतिशत मत कटाउनु अनिवार्य छ । यो सीमा पूरा नुहँदा उसले समानुपातिकतर्फ कम्तीमा ४ सिट गुमाउनु पर्ने भएको छ ।

प्रतिनिधिसभातर्फ समानुपातिकमा एक करोड चार लाख २० हजार १२५ मत सदरभएकोमा एकीकृत समाजवादीले सोमबार मध्याह्नसम्म दुई लाख ९४ हजार ३६२ मत पाएको छ । त्यसमा थप १८ हजार २४२ मत आवश्यक पर्छ । तर मतगणना गर्न बाँकी रहेका सबै मत पाए मात्र उसलाई राष्ट्रिय दल बन्ने बाटो खुला हुन्छ । तर गन्न बाँकी सबै उसकै हुने संभावना छैन ।

यस्ताे अवस्थामा ‘थ्रेसहोल्ड’ कटाउन नसकेका सबै दललाई प्राप्त समानुपातिक सबै मत राष्ट्रिय दलकाे दर्ज पाएका दलहरूले अनुपातमा बाँडेर लिन्छन् ।

‘थ्रेसहोल्ड’ कटाएको खण्डमा एकीकृत समाजवादीले समानुपातिकमा ४ सिट पाउन सक्थ्यो । एकीकृत समाजवादीले प्रत्यक्षतर्फ भने १० सिट जितेको छ । उसले चुनावमा सरकारको नेतृत्व गरिरहेको नेपाली कांग्रेस, सरकारमा रहेका दल नेकपा (माओवादी केन्द्र), राष्ट्रिय जनमोर्चा गठबन्धन गरेको थियो ।