प्रधानमन्त्री प्रचण्ड र मन्त्रीहरुको पशुपति यात्रा धार्मिक कि राजनीतिक ?

२८ जेठ, काठमाडौं । प्रधानमन्त्री पुष्पकमल दाहाल  प्रचण्डसहित मन्त्रिपरिषदका सदस्यको पशुपति दर्शन धार्मिक कि राजनीतिक भन्दै प्रश्न उठेको छ । विभिन्न तहबाट पशुपतिको दर्शनमाथि टीका टिप्पणी सुरु भएका छन् । पूर्वप्रधानमन्त्री बाबुराम भट्टराईले पनि प्रधानमन्त्री प्रचण्डको पशुपति दर्शन माथि प्रश्न उठाएका छन् । 

नेपाल समाजवादी पार्टीका अध्यक्षसमेत रहेका भट्टराईले प्रधानमन्त्री प्रचण्डको पशुपति दर्शनलाई राजनीतिक उद्देश्यले प्रेरित रहेको टिप्पणी गरेका हुन । ‘कोही एक्लै वा सपरिवार कुनै धार्मिक स्थल जँदा प्रश्न उठाउन मिल्दैन, त्यो उसको निजी आस्थाको कुरा हो,’ भट्टराईले प्रचण्डको पशुपति दर्शनको तस्विर राख्दै  लेखेका छन, ‘तर जब पूरै मन्त्रिमण्डल एकैसाथ र एउटा श्रृंखलामा धार्मिक स्थल जान्छ, त्यो राजनीति हुन्छ र प्रश्न उठ्छ ।’

प्रधानमन्त्री प्रचण्डसहितको मन्त्रिपरिषदका सदस्यले शनिबार आज साँझ पशुपति क्षेत्रको निरीक्षण अवलोकन गर्दै दर्शन गरेका थिए । उनलाई उक्त क्षेत्रको पुरातात्त्विक, सांस्कृतिक, धार्मिक महत्वका बारेमा पशुपति क्षेत्र विकास कोषका पदाधिकारीहरूले जानकारी गराएका थिए । 

प्रधानमन्त्रीले विश्व सम्पदाका रुपमा रहेको पशुपति क्षेत्रलाई अझै व्यवस्थित गरी धार्मिक पर्यटनमा ठूलो टेवा मिल्ने बताए । उक्त निरीक्षण अवलोकनमा अर्थमन्त्री प्रकाश शरण महत, परराष्ट्र मन्त्री एनपी साउद, पर्यटन, उर्जा मन्त्री शक्ति बस्नेत, संस्कृति तथा नागरिक उड्डयन मन्त्री सुदन किराँती लगायत पनि सहभागी थिए ।

शनिबार साँझ केही मन्त्रीहरूसँगै पशुपतिनाथ पुगेका उनले दर्शन गरेका हुन् । त्यस क्रममा उनलाई संस्कृति, पर्यटन तथा नागरिक उडड्यनमन्त्री सुदन किराँतीले स्वागत गरेका थिए ।