कांग्रेसले चाह्याे भने भोलि नै सरकार ढल्न सक्छः गृहमन्त्री

१२ फागुन, राजविराज । उपप्रधान तथा गृहमन्त्री नारायणकाजी श्रेष्ठले वर्तमान सत्ता गठबन्धन र सरकारको आयु कति छ भन्ने कुरा कांग्रेसको हातमा निर्भर रहेको बताएका छन् । उनले नेपाली कांग्रेसले चाहेसम्म यो गठबन्धन र सरकार दुवै स्थिर रुपमा रहिरहने बताएका छन् । कांग्रेसले चाहे भोलि सरकार ढल्ने उनको भनाइ छ ।  

सप्तरीको खडक नगरपालिका स्थित बिसनपुरमा शनिबार सञ्चारकर्मीसँग कुराकानी गर्दै गृहमन्त्री श्रेष्ठले अहिलेको गठबन्धनलाई कसरी चलाउने र कहिलेसम्म लाने भन्ने कुरा कांग्रेस बाहेक अरूले भनेर नहुने बताए । कांग्रेस सबैभन्दा ठूलो दल हो । सरकारमा उसैको बहुमत छ । उसले चाहे पाँच वर्ष नै प्रचण्ड प्रधानमन्त्री बन्न सक्नुहुन्छ, उनले भने ।  

वर्तमान गठबन्धन र सरकारबारे सोधिएको प्रश्नमा गृहमन्त्री श्रेष्ठले भने, ’यो नेपाली कांग्रेसलाई सोध्नुहोस् । प्रमुख प्रतिपक्षी दलले मन्त्रीहरूको राजीनामा माग गरिरहेको प्रश्नमा गृहमन्त्री श्रेष्ठले राजीनामा माग्ने विपक्षीको धर्म भएको बताए । उनले एमालेलाई औचित्यपूर्ण ढंगबाट राजीनामा मागे राम्रो हुने सुझाव दिए । सामन्तवादको निकृष्ट अवशेष मिटर ब्याज समस्या रहेको बताउँदै गृहमन्त्री श्रेष्ठले सरकार मिटरब्याज पीडितको समस्या समाधान गर्न गम्भीरतापूर्वक सरकार लागिरहेको बताए ।

समस्या समाधानका लागि काठमाडौं पुगेका मिटरब्याज पीडितहरुलाई गृहमन्त्री श्रेष्ठले भने, ’समस्या समाधान हुन्छ, हामीले छोडेका छैनौं, कानुन बनायौँ, आयोग बनायौँ, आयोगको समय सकिएपछि अहिले प्रहरीमा सबै उजुरी पठाएका छौँ, साढे पाँच हजारभन्दा बढी पीडितले न्याय पाएका छन् ।’