आर्थिक समस्याले थलिएको नेपाल शेयर मार्केट्सको संयोजकमा अधिकारी चयन

चैत २८, काठमाडौं । नेपाल राष्ट्र बैंकले आर्थिक समस्याले थलिएको नेपाल सेयर मार्केट्स एन्ड फाइनान्स लिमिटेडको व्यवस्थापन समूहको संयोजकमा रोशनकुमार अधिकारीलाई छनोट गरेको छ । राष्ट्र बैंकले अन्तिम नतिजा सार्वजनिक गर्दै रोशनकुमार अधिकारी छनोट भएको जनाएको हो । 

वैकल्पिक उमेदवारका रुपमा प्रकाश घिमिरे र गोविन्दप्रसाद शर्मा छनोट भएका छन् । अधिकारी उपस्थित नभए मात्र उनीहरुमध्ये एकले मौका पाउनेछन् । बैंकले प्रकाशित गरेको सुचना अनुसार छनोटमा परेका मुख्य उम्मेदवारले नियुक्तिका लागि २०८१ वैशाख २ गतेभित्र राष्ट्र बैंकमा सम्पर्क राख्नु पर्ने हुन्छ । उक्त मितिभित्र सम्पर्कमा नआएमा योग्यताक्रम अनुसारका वैकल्पिक उम्मेदवारलाई नियुक्ति दिइने राष्ट्र बैंकले जनाएको छ । 

समस्याग्रत नेपाल शेयर मार्केट्स एन्ड फाइनान्सको संयोजक बन्न आवेदन दिएका पाँच उम्मेदवारमध्येबाट रोशन कुमार अधिकारी छनोट भएका हुन् । कम्पनीको व्यवस्थापन समूहको संयोजक पद पदपूर्ति गर्न नेपाल राष्ट्र बैंकले दरखास्त माग गरेको थियो । सोही बमोजिम दरखास्त दिएका मध्येबाट पाँच जनालाई छनोट गरि बैंकले व्यवसायिक कार्ययोजना पेश गर्न भनेको थियो । कार्ययोजना प्रस्तुतीकरणका लागि छनोट भएका मध्ये प्रकाश घिमिरे र गोविन्द प्रसाद शर्मा वैकल्पिक उम्मेदवारमा परेका छन् ।