माधव नेपालको पार्टीले सत्ता समीकरणमा अराजनीतिक र अवसरवादी चरित्र देखायोः ओली

३ वैशाख, काठमाडौं । नेकपा एमालेका अध्यक्ष केपी शर्मा ओलीले माधव नेपाल नेतृत्वको नेकपा एकीकृत पार्टीको निर्णयप्रति आक्रोश व्यक्त गरेका छन् । उनले नेकपा एसलाई राजनीतिक चरित्र नभएको पार्टीको संज्ञा दिएका छन् । सुदूरपश्चिम प्रदेश सरकार गठनमा कांग्रेस गठबन्धनलाई साथ दिएकोमा एकीकृत समाजवादीप्रति ओलीले यस्तो बताएका हुन् । 

एमाले संसदीय दलको सोमबार बसेको बैठकमा अध्यक्ष ओलीले यो अराजनीतिक र दक्षिणपन्थी अवसरवादी चरित्र भएको बताए । आफूहरूसँग हुँदा मुख्यमन्त्री दिन नसक्ने बताएको एकीकृत समाजवादीले कांग्रेसलाई जिताउने र समीकरण कमजोर बनाउन भने नागरिक उन्मुक्तिलाई नै पहिलो कार्यकाल दिन तयार भएको बताए ।
‘दक्षिणपन्थी अवसरवादी चरित्र धेरै नाङ्गो ढंगले प्रकट भयो’ कम्युनिस्ट साइनबोर्ड राखेर काम चाहिँ कांग्रेसको पक्षमा गरेको भन्दै उनले भने, ‘यसले फरक पार्ने वाला छैन ।’  

उनले विपक्षीहरुको आशा पलाउने गरी र जनतामा केही मात्रामा भएपनि निराशा पलाउने गरी त्यस पार्टीले कदम चालेको बताए । आन्तरिक रुपमा एकीकृत समाजवादीको बोली र व्यवहार बार्गेनिङ गर्ने खालकै भएको र सुदुरपश्चिममा बाहिरै प्रकट भएको उनले बताए ।